Astanada kúres túrlerinen álem chempıonatynyń ashylý saltanaty qalaı ótti
ASTANA. KAZINFORM — Astanada kúres túrlerinen álem chempıonatynyń saltanatty ashylý rásimi ótti. Іs-sharaǵa Týrızm jáne sport mınıstri Erbol Myrzabosynov, Qazaqstan kúres federatsııasynyń prezıdenti Erkin Oqasov jáne United World Wrestling uıymynyń prezıdenti Nenad Lalovıch qatysty, dep habarlaıdy elorda ákimdiginiń resmı saıty.
Saltanatty rásim barysynda mınıstr Memleket basshysy Qasym-Jomart Toqaevtyń álem chempıonatyna qatysýshylar men qonaqtarǵa joldaǵan quttyqtaý jedelhatyn oqyp berdi.
— Kúres — kúsh-jigerdi, erik pen minezdi shyńdaıtyn olımpıadalyq sport túri. Ózindik dástúri men tereń tarıhy bar bul jekpe-jek óneriniń Qazaqstan halqy úshin mańyzy zor. Sondyqtan ulttyq merekemiz — Respýblıka kúni toılanyp jatqan shaqta álemniń úzdik balýandary bas qosqan osyndaı bedeldi jarystyń Astanada ótýi elimiz úshin úlken mártebe, — delingen jedelhatta.
Kúres túrlerinen álem chempıonaty Astanada 24 qazan men 1 qarasha aralyǵynda ótedi. Jarysta 135 elden kelgen 900-ge jýyq sportshy jarys jolyna shyǵady.
Álem chempıonatynyń Astanada ótýi halyqaralyq sport qaýymdastyǵynyń Qazaqstanǵa degen senimin jáne elimizdiń eń joǵary deńgeıdegi jarystardy ótkizýge daıyn ekenin kórsetedi.
Mundaı týrnırler halyqaralyq yntymaqtastyqty nyǵaıtýǵa, otandyq kúres mektebin damytýǵa jáne óskeleń urpaq arasynda sportty nasıhattaýǵa yqpal etedi.
Bul chempıonat elimizde ótip jatqan iri halyqaralyq jarystar legin jalǵastyrady.
Mundaı jumystar Qazaqstannyń óńirdegi jetekshi sport ortalyqtarynyń biri retindegi ornyn nyǵaıtýǵa jáne otandyq sportshylardyń múmkindikterin keńeıtýge baǵyttalǵan.
Buǵan deıin Almatbek Amanbek kúresten álem chempıonatynyń shırek fınalyna joldama alǵanyn jazdyq.
