Astanada kúres túrlerinen 2026 jylǵy álem chempıonaty ótedi
ASTANA. KAZINFORM – Birikken kúres álemi uıymy (UWW) 2026 jylǵy kúres túrlerinen álem chempıonatyn ótkizetin qala retinde Astana qalasyn resmı túrde bekitti.
Tıisti sheshim uıymnyń Atqarýshy komıteti otyrysynda qabyldandy.
Jıyn barysynda qazirgi geosaıası jaǵdaı men halyqaralyq saparlarǵa áser etip otyrǵan ózge de qıyndyqtar talqylanǵan.
Bastapqyda álem chempıonatyn byltyr ótkizý quqyǵyna ıe bolǵan Manama qalasy uıymdastyrýy tıis edi. Alaıda UWW men Bahreın kúres federatsııasy birlesken málimdeme jasap, týrnırdiń basqa elge aýystyrylǵanyn habarlady.
Inspektsııalyq saparlar men sport nysandarynyń daıyndyǵyn baǵalaý qorytyndysy boıynsha álem chempıonatyn ótkizý quqyǵy Qazaqstanǵa berilgen.
Dúbirli doda Barys Arena kesheninde ótedi.
Aıta keteıik, Qazaqstan astanasy buǵan deıin de 2019 jyly kúres túrlerinen álem chempıonatyn ótkizgen bolatyn.
Týrnırdiń naqty kestesi men jarysty uıymdastyrýǵa qatysty ózge málimetter keıinirek jarııalanady.
Buǵan deıin Azııa chempıonatynda Qazaqstan namysyn qorǵaıtyn balýandar belgili boldy.
