Astanada kúrelgen úılerdiń ornynda 6 gúl baǵy salynady
NUR-SULTAN. QazAqparat - 2018 jyldan bastap elordada ákiminiń tapsyrmasy boıynsha kúrelgen úılerdiń ornyna jelekjoldar men gúl baqtary salynýda, dep habarlaıdy QazAqparat ákimdiktiń saıtyna silteme jasap.
Maqsat - azamattardyń turmysy men tynyǵýy úshin ekologııalyq taza jaǵdaı jasaý, olarǵa otbasylarymen birge demalýyna yńǵaıly jaǵdaı jasaý. Jelekjoldar men gúl baqtary tolyǵymen abattandyrylyp, kógaldandyrylmaq. Sondaı-aq, olar jaryqpen qamtamasyz etiledi, sporttyq jáne balalar oıyn alańdary, shaǵyn sáýlet nysandary ornatylady. Qorshaǵan ortany qorǵaý jáne tabıǵatty paıdalaný basqarmasynyń málimetteri boıynsha, 2019 jyly kelesi saıabaqtar men gúl baqtarynyń qurylysy josparlanǵan.
І.Esenberlın kóshesindegi № 36 úıdiń orny. Gúl baǵynyń jalpy aýdany -4 783,9 sharshy metr, qurylys-montaj jumystary 2019 jyldyń mamyrynan shilde aıyna deıin júrgiziledi dep josparlanǵan.
B.Maılın kóshesindegi № 9 úıdiń janyndaǵy alań. Baqtyń jalpy aýdany - 7 521,7 sharshy metr. Qurylys jumystary 2018 jyldan beri júrgizilýde. Ol 2019 jyldyń shildesinde aıaqtalady.
Á.Moldaǵulova kóshesindegi gúl baǵy, № 19 jáne № 21 úılerdiń mańy. Qoǵamdyq gúl baǵynyń aýdany 14 113,9 sharshy metr. Qurylys-montajdaý jumystary 2018 jyldan beri júrgizilýde. Qurylystyń aıaqtalý merzimi - 2019 jyldyń qyrkúıegi.
Saryarqa dańǵylyndaǵy № 23 úıdiń janyndaǵy gúl baǵy. Jalpy aýdany - 5 917 sharshy metr. Qurylys jumystary 2019 jyldyń maýsymynan qyrkúıek aıyna deıin jalǵasady dep josparlanǵan.
Abaı dańǵylyndaǵy jelekjol, Kúltóbe kóshesinen Sembınov kóshesine deıin jáne Egemen Qazaqstan kóshesinen B.Beısekbaev kóshesine deıingi aýmaq. Jelekjoldyń aýdany - 9 087 sharshy metr. Qurylys jumystary 2018 jyldan beri júrgizilýde. Jumystar 2019 jyldyń qyrkúıeginde aıaqtalmaq. Jeńis dańǵylynyń jáne Á. Jangeldın kóshesiniń qıylysyndaǵy jelekjol. Qurylys aýdany - 3 087,6 sharshy metr. Josparǵa sáıkes qurylys-montaj jumystary 2019 jyldyń maýsymynda bastalyp, qyrkúıek aıynda aıaqtalady.
