Astanada kúrdeli jóndeýden ótken qutqarýshylar jataqhanasynyń qazirgi kelbeti qandaı
ASTANA. KAZINFORM — Astananyń oń jaǵalaýynda ornalasqan № 3 mamandandyrylǵan órt sóndirý bóliminde bıylǵy jóndeý jumystary aıaqtaldy, dep habarlaıdy TJM.
Jańǵyrtý Tótenshe jaǵdaılar mınıstri general-maıor Shyńǵys Árinovtyń tapsyrmasy boıynsha jeke quramnyń qyzmet etý jáne úı jaǵdaılaryn jaqsartý maqsatynda júrgizildi.
Jóndeý jumystary 2024 jyldyń aqpan aıynda Tótenshe jaǵdaılar mınıstri qutqarýshylardyń eńbek jáne turmys jaǵdaılaryn baǵalap, elordanyń barlyq órt sóndirý bólimderine barǵan kezde bastaldy. Sapar barysynda qyzmettik mindetterdi tıimdi oryndaý úshin qajetti qolaıly jaǵdaılar jasaý, sondaı-aq jeke quram úshin eńbek jaǵdaılaryn jaqsartý boıynsha birqatar tapsyrma berildi.
Alty aıdan az ýaqyt ishinde jóndeý jumystary aıaqtalyp, aıtarlyqtaı ózgeristerdi qamtydy.
Bólim ǵımaratynyń eki qabaty jańartyldy, rezervtik boks pen transformatorlyq qosalqy stantsııanyń shatyry aýystyryldy jáne ǵımarattyń aınalasyndaǵy tósenish betondaldy.
Іshki úı-jaılar da kúrdeli ózgeristerden ótti: dýsh, jýynatyn bólmeler, oqý synyptary, ashana, demalys bólmeleri jáne qyzmettik úı-jaılar jóndeldi.
Sondaı-aq, «Batyr team» sport zaly jańartyldy.
Bólim aýmaǵynda sportpen shuǵyldanýǵa arnalǵan jańa workout-alańdar jáne jasyl alleıa ornatyldy, qaraǵaılar men shyrshalar otyrǵyzyldy.
Bul órt sóndirýshiler men olardyń otbasylarynyń bos ýaqytyna erekshe kóńil-kúı beredi.
Mınıstr óńirlerdegi TJM nysandarynyń ınfraqurylymyn jańǵyrtý boıynsha jumystardy júrgizýdi aýmaqtyq departamentterdiń bastyqtaryna da tapsyrdy. Olar da jóndelgen órt sóndirý bólimin aralady.
— Qazirgi tańda elimizdiń barlyq aımaqtarynda órt sóndirý bólimderin jańǵyrtý jáne jóndeý jumystary júrgizilýde. Biz negizgi jumys jasalatyn úı-jaılarǵa ǵana emes, sondaı-aq qyzmettik jataqhanalarǵa da nazar aýdaramyz. Qutqarýshylardyń yńǵaıly jáne tıimdi jumysyna yqpal etetin jaǵdaılar jasaýǵa tyrysamyz. Sol sebepti ár aımaqta qyzmettik apartamentteri de bar № 23 biregeı órt sóndirý bólimine uqsas keńistik qurý mańyzdy, — dep Tótenshe jaǵdaılar mınıstri general-maıor Shyńǵys Árinov atap ótti.
№ 3 órt sóndirý bóliminde kún saıyn tótenshe jaǵdaılarǵa den qoıýǵa belsendi qatysatyn 90-ǵa jýyq qyzmetker qyzmet atqarady. Ekinshi kezeńde qyzmettik jataqhanalarǵa kúrdeli jóndeý júrgizý josparlanýda. Kez kelgen ýaqytta kómekke ázir keletin qutqarýshylar úshin jasalǵan barlyq qolaıly jaǵdaılar olardyń jumysynyń tıimdiligin arttyrýǵa yqpal etedi.
Osyǵan deıin Tótenshe jaǵdaılar mınıstri Shyńǵys Árinov órt sóndiretin drondardy qanshaǵa satyp alatynyn aıtty.