Astanada qurbysynyń úıine baryp, altyn áshekeılerin jymqyryp ketken áıel ustaldy

ASTANA. KAZINFORM –  Astanada qurbysynyń páterinen zergerlik buıymdar urlaǵan turǵynnyń isi áshkere boldy.

ІІM baspasóz qyzmetiniń málimetinshe, astanalyq áıel dosynyń páterinen 430 myń teńgeniń altyn áshekeılerin jymqyryp ketken. Polıtsııaǵa qala turǵyny habarlasyp, onyń páterinen altyn saqınasy men altyn syrǵalary joǵalǵanyn habarlaǵan.

Jedel-izdestirý sharalaryn júrgizý barysynda Nura aýdanynyń krımınaldyq polıtsııa qyzmetkerleri jábirlenýshiniń 27 jastaǵy tanysyn anyqtady.

Kúdikti dosyna qonaqqa kelgen kezde páter ıesiniń úı sharýasyna aınalǵanyn paıdalanyp, onyń altyn áshekeılerin ıemdenip úlgergen. Ol qobdıshada saqtalǵan zergerlik buıymdardy lombardqa tapsyryp jibergeni belgili bolǵan.

Osy fakt boıynsha QR QK-niń 188-baby (Urlyq) boıynsha sotqa deıingi tergeý júrgizilip jatyr.