Astanada qurbandyq shalý tártibine qatysty mańyzdy eskertý jasaldy
ASTANA. KAZINFORM — Astana qalasynyń Sanıtarııalyq-epıdemıologııalyq baqylaý departamenti Qurban aıt merekesi qarsańynda qurbandyqqa shalýǵa mal soıý, et ónimderin saqtaý jáne tutyný kezinde sanıtarııalyq jáne veterınarııalyq talaptardy saqtaý qajettigin eskertti.
— Bul sharalardyń negizgi maqsaty — ınfektsııalyq jáne parazıttik aýrýlardyń aldyn alý, sondaı-aq taǵamnan ýlaný jaǵdaılaryn boldyrmaý. Eń aldymen, qurbandyqqa mal soıý tek arnaıy belgilengen oryndarda — resmı mal soıý pýnktteri men jergilikti atqarýshy organdar aıqyndaǵan alańdarda júrgizilýi tıis ekenin eske salamyz, — dep habarlady departamentten.
Bul ne úshin mańyzdy?
Mamandandyrylǵan obektilerde qajetti sanıtarııalyq jaǵdaılar qamtamasyz etiledi:
— soıý aldynda qurbandyqqa shalynatyn iri qara nemese usaq malǵa veterınarııalyq tekserý júrgiziledi;
— soıylǵannan keıin etke veterınarııalyq-sanıtarııalyq saraptama jasalady;
— ónimdi qaýipsiz saqtaý jáne qaldyqtardy kádege jaratý úshin qajetti jaǵdaılar qarastyrylǵan.
Aýlalarda, jeke sektorlarda, turǵyn úılerdiń mańynda nemese basqa da belgilenbegen oryndarda maldy soıýǵa tyıym salynady, óıtkeni bul ınfektsııanyń taralý, qorshaǵan ortanyń lastaný jáne juqpaly aýrýlardyń paıda bolý qaýpin týdyrady.
Soıýǵa tek veterınarııalyq turǵydan qolaıly sharýashylyqtardan shyqqan saý maldar ǵana jiberiledi.
— Etti saqtaý talaptaryna erekshe nazar aýdarý qajet. Soıýdan keıin et salqyndatylǵan kúıde saqtalýy tıis. Et ónimderin kúnniń astynda, avtokólikterde nemese bólme temperatýrasynda uzaq ýaqyt qaldyrýǵa bolmaıdy, — dep eskertti Sanıtarııalyq-epıdemıologııalyq baqylaý departamentinen.
Et satyp alý kezinde onyń syrtqy túrine, túsine, ıisine jáne konsıstentsııasyna nazar aýdarý kerektigi aıtylǵan.
Jańadan soıylǵan et ónimderinde bógde ıis, shyrysh, jabysqaqtyq nemese daqtar bolmaýy kerek. Tutynar aldynda et mindetti túrde muqııat termııalyq óńdeýden ótkizilýi qajet.
Sondaı-aq kelesi usynymdardy saqtaý mańyzdy:
- etpen jumys isteýdiń aldynda jáne keıin qoldy jýý;
- shıki et pen daıyn ónimder úshin bólek pyshaqtar men taqtaılardy paıdalaný;
- daıyn taǵamdardy tek tońazytqyshta saqtaý.
— Eger siz qoǵamdyq oryndarda nemese turǵyn úı sektorynda maldy ruqsatsyz soıýǵa kýá bolsańyz, 102 nómiri arqyly polıtsııa organdaryna habarlasý qajet. Qurmetti turǵyndar! Óz densaýlyqtaryńyzdy saqtap, et ónimderin tek arnaıy belgilengen saýda oryndarynan jáne veterınarııalyq ilespe qujattary bolǵan jaǵdaıda ǵana satyp alyńyzdar, — delingen habarlamada.
Aıta keteıik, buǵan deıin Bas múftı kásipkerlerdi Qurban aıt qarsańynda mal baǵasyn kótermeýge shaqyrdy.
