Astanada qurban shalatyn oryndar belgilendi
ASTANA. QazAqparat - Astanada aldaǵy Qurban aıt merekesine oraı qurban shalatyn oryndar belgilendi, dep habarlady https://astana.gov.kz.
«Qurban aıt - barsha musylman úshin ulyq mereke. Bıyl ol 4-qazanǵa tuspa-tus kelip tur. Aıt namazy Astana ýaqyty boıynsha tańǵy saǵat 8.00-de bastalady. Qurbandyq shalý namaz oqylǵannan keıin ǵana júzege asyrylýy kerek. Óıtkeni oǵan deıin soıylǵan mal óz qajettiligimizdi ótegenmen teń. Al, qasapshylar aldymen tirkeýge turýy kerek.
Bıyl qasapshylardyń ózi medıtsınalyq anyqtamasymen meshitke kelip aldyn-ala tirkeledi. Olarǵa meshitte arnaıy semınarlar ótkiziledi. Biz sharıǵatta qalaı qurbandyq shalý kerektigin úıretemiz". - deıdi «Nur Astana» ortalyq meshitiniń bas ımamy Naýryzbaı qajy Ótpenov».
Búginde qurbandyq shalý oryndary bekitilgen. Qazir qala bazarlary men sharýa qojalyqtarynda arnaıy oryndar daıyndalýda. Ol Astanadaǵy «Kek» bazary, «Pışekombınat Astanalyq» JShS, «Shaýshen», «Temesh» sharýa qojalyqtary men «Altyn taǵa» mal bazary. Bıylǵy jyldyń taǵy bir ereksheligi, «Rabbyń úshin qurbandyq shal» qaıyrymdylyq aktsııasyna qatysyp, birneshe kisimen birigip qurban shalýǵa bolady.
«Rabbyń úshin qurbandyq shal» aktsııasyn ótkizip jatyrmyz. Kisiler jınalyp, bir qara maldy jeti adam birigip qurbandyqqa shala alady. Bolmasa jeke kisi qoı, nemese eshkisin qurbandyqqa shalýyna bolady. Aktsııanyń maqsaty jetim-jesirlerge, jaǵdaıy nashar kisilerge et taratý», - deıdi «Nur Astana» ortalyq meshitiniń bas ımamy.
Al, elordadaǵy 8 meshit mereke kúnderi jamaǵatty qabyldap, qurbandyq etterin muqtaj jandarǵa taratýǵa daıyn. Byltyr 9 tonna et taratylypty. Qurban shalýǵa shamasy kelmegen kisiler 8 meshittiń qaısysy yńǵaıly bolsa, sonda baryp, Aıt namazyna qatysa alady. Jamaǵatpen birge tilegen tilek qashan da qabyl bolady.
Aıta keteıik, qurbandyqqa qoı, eshki, sıyr, túıe jaramdy. Qurbandyq malynyń deni saý, etti jáne dene músheleri kem bolmaýy kerek. Qurban shalǵan kisiler etti tolyǵymen sadaqaǵa berýi shart emes. Onyń bir bóligin otbasymen jeýine, ne bolmasa, ózderi etke muqtaj bolsa, túgeldeı alyp qalýyna bolady.
