Astanada Qurban aıttyń alǵashqy kúni qaıyrymdylyq jármeńkesi ótti (FOTO)
Jármeńke barysynda meshittiń áıel ustazdary men dinı saýat ashý kýrsynyń názikjandy shákirtteri ózderi ázirlegen taǵam túrlerin saýdaǵa shyǵaryp, saýapty iske óz úlesterin qosýǵa tyrysty.
Ystyq taǵam ázirlep, túrli táttiler daıyndap túnimen tynym tappaǵan qyz-kelinshekterdiń eńbegi elenip, aıt namazynan soń meshit aýlasyndaǵy qazaq úıi aldy qaraqurym halyqqa toldy. Saýdadan túsken qarajattyń qaıyrymdylyq sharasyna jumsalatynyn estigen jamaǵat ta jomarttyq tanytyp, saýda kórigin qyzdyra tústi.
«Áziret Sultan»meshitiniń dinı saýat ashý kýrsynda oqıtyn qyz-kelinshekter men meshit qyzmetkerleriniń bul bastamasyna «Áziret Sultan meshitiniń ájeleri» atanǵan bir top aqjaýlyqty apalarymyz kelip, alǵystaryn aıtyp, batalaryn arnady.
Atalmysh jármeńkeden túsken qarajattyń barlyǵyna aldymyzda kele jatqan Halyqaralyq múgedekter kúnine oraı Astana qalasyndaǵy kemtar jandarǵa kómek kórsetiletin bolady.