Astanada Qurban aıtta mal soıylatyn bes oryn belgilendi
ASTANA. KAZINFORM — Astana qalasynyń sanıtarııalyq-epıdemıologııalyq baqylaý departamenti basshysynyń orynbasary Muhamǵalı Aryspaev Qurban aıt merekesin ótkizý tártibi jáne elordada bekitilgen qurban shalý oryndary týraly málimet berdi, dep habarlaıdy Kazinform agenttiginiń tilshisi.
Onyń aıtýynsha, 2026 jyly qasıetti Qurban aıt merekesi 27-29 mamyr aralyǵynda ótedi. 27 mamyr kúni saǵat 06:00–de qala meshitterinde aıt namazy oqylyp, odan keıin arnaıy belgilengen oryndarda qurban shalý rásimi bastalady.
— Astana qalasynda bekitilgen oryndarda qurban shalý rásimi kún saıyn saǵat 07:00–den 18:00–ge deıin júrgiziledi, — dedi Muhamǵalı Aryspaev.
Onyń málimetinshe, elordada qurban shalý úshin bes resmı oryn belgilengen:
— «Baıqońyr» aýdanynda — «Shanhaı», «Barakat», «Jaılaý» bazarlarynyń aýmaǵynda jáne «Shaýshen» sharýa qojalyǵynda uıymdastyrylady;
— Almaty aýdanynda qurban shalý «Jeleznodorojnyı» turǵyn alabyndaǵy «Et-Han» et óńdeý tsehynyń aýmaǵynda ótkiziledi.
Qazirgi tańda Astana qalasynyń ákimdigi Qazaqstan musylmandary dinı basqarmasymen jáne tıisti memlekettik organdarmen birlesip, mereke kúnderi sanıtarııalyq talaptar men ózge de normalardyń saqtalýyn qamtamasyz etý úshin daıyndyq jumystaryn júrgizip jatyr.
Buǵan deıin Bas múftı kásipkerlerdi Qurban aıt qarsańynda mal baǵasyn kótermeýge shaqyrdy.
Kamıla Taıtóleý
