Astanada Qurban aıt merekesine oraı birqatar sharalar uıymdastyrylýda
ASTANA. QazAqparat - Búgin musylman qaýymynyń ulyq merekesi - Qurban aıttyń birinshi kúni. Tańerteń meshitterde aıt namazy oqylýda. Mereke úsh kúnge - 4, 5 jáne 6 qazanǵa jalǵasady.
Astanada birqatar merekelik sharalar uıymdastyrylyp jatyr. «Nur Astana» jáne «Áziret Sultan» meshitteriniń aldyndaǵy alańdarda aıt namazynan keıin merekelik jármeńke bastaldy. Sondaı-aq sporttyq jarystar ótkiziledi. 5 qazanda saǵat 16.00-de «Han Shatyr» saýda oıyn-saýyq ortalyǵynyń aýmaǵynda «Nur Astana» meshitiniń qoldaýymen «Qurban aıt qutty bolsyn!» kontserti uıymdastyrylady. Sonymen qatar bıyl mal soıýǵa ruqsat etilgen jerlerdiń biri - «Altyn taǵa» bazarynda «Rabbyń úshin qurbandyq shal» qaıyrymdylyq sharasy ótedi. Aıta keteıik, bıyl mal satý jáne soıý «Altyn taǵa» bazarynda, «Azyq-túlik kombınaty-Astanalyq plıýs» JShS, «Nurbereke 555» JShS, «Sháýmen» jáne «Temesh» sharýa qojalyqtarynda júzege asyrylady. 4-6 qazanda meshit qyzmetkerleri qaladaǵy muqtaj jandardyń úılerine arnaıy baryp aıt merekesimen quttyqtap, azyq-túlik jáne qurbandyqqa shalynǵan mal etterimen kómek kórsetedi. Al qarttar úıindegi jandarǵa «Qarttarym - asyl qazynam» merekelik rýhanı keshi syılanbaq, dep habarlanǵan elorda ákimdiginiń resmı saıtynda.
