Astanada Qurban aıt kúnderi qurbandyq maldaryn satý jáne soıý «Altyn taǵa» bazarynda júzege asyrylady

Bul týraly Astana qalasy ákimdiginiń baspasóz qyzmetinen málim etti.

Eske salaıyq, Astana qalasy ákimdiginiń sheshimimen 2010 jyldan bastap Qurban aıt kúnderi sanıtarlyq talaptardy saqtaý úshin dinı rásimderdi atqarýǵa oryndar arnaıy belginedi. Onymen birge, qurbandyq maldaryn meshitter men turǵyn úılerdiń aýmaqtarynda, balalardyń oıyn alańdarynda satýǵa jáne soıýǵa qatań tyıym salyndy.

Qosshy kentinen (Astanadan 16 shaqyrym) 2 shaqyrym jerdegi «Altyn taǵa» mal bazarynda júk mashınalary men jekemenshik kólikter toqtaıtyn turaqtar, qasaphanalar men et buzatyn oryndar daıyndaldy.

Sondaı-aq musylmandardyń yńǵaıy úshin aıt kúnderi №27-shi avtobýstyń baǵyty Qosshy kentinen «Altyn taǵa» bazaryna deıin uzartylady.

Bıyl musylmandardyń ulyq merekeleriniń biri - Qurban aıt meıramy 6-8 qarasha kúnderi atap ótiledi. Meıram jyl saıyn hıjra - musylman kúntizbesi boıynsha Zúlhıja aıynyń onynshy juldyzynda (Arafa kúninen keıin) jáne Oraza aıt meıramynan 70 kún ótkennen keıin bastalady.

Musylmandar meıramnyń alǵashqy kúni jaqsylap ǵusyl quıynǵannan (deneni tolyqtaı jýý) keıin, ádemi taza kıimderin kıip, ústine hosh ıis seýip, meshitke aıt namazyna barady. Bıyl aıt namazy elorda meshitterinde tańerteńgi saǵat 09.00-de oqylady. Aıt namazy oqylǵannan keıin Allah razylyǵy úshin mal shalynyp, aq túıeniń qarny jarylady. Kórshi-qolań, týys-týǵandy qydyrystap, «Aıt qutty bolsyn!» aıtysady. Al osy kúnderi Mekkede qajylyqtaryn óteýshiler Mına alqabynda qurbandyq shalý rásimi men qajylyqtyń basqa da talap-sharttaryn atqarady.