Astanada Qurban aıt kúnderi qurbandyq maldaryn satý jáne soıý «Altyn taǵa» bazarynda júzege asyrylady

Astana qalasy ákimdiginiń sheshimimen, Qurban aıt merekesi atap ótiletin 16, 17 jáne 18 qarasha kúnderi qurbandyqqa shalynatyn maldardy satý jáne olardy soıý burynǵydaı elorda meshitteriniń (4 meshit bar) aýmaǵynda júzege asyrylmaıdy. Bul kúnderi sanıtarlyq talaptardy saqtaý úshin dinı rásimderdi oryndaýǵa bir ǵana oryn belgilenip otyr. Ol Qosshy kentinen (Astanadan 16 shaqyrym) 2 shaqyrym jerdegi «Altyn taǵa» mal bazarynda ornalasady.

Bazar aýmaǵynda júk mashınalary men jekemenshik kólikter toqtaıtyn turaqtar, qasapqanalar men et buzatyn oryndar daıyndaldy. Onda sondaı-aq mindetti túrde meshit qyzmetkerleri, qasapshylar, tazalyqshylar, tártip saqshylary, medıtsına qyzmetkerleri men tıisti basqa da qurylymdar ornalasady.

Sondaı-aq musylmandardyń yńǵaıy úshin aıt kúnderi «Nur Astana» meshitiniń aldynan «Altyn taǵa» bazaryna deıin №27 jolaýshylar avtobýsy qatynaıtyn bolady. Jolaýshylar kóligi jáne avtomobıl joldary basqarmasy bul kúnderi atalmysh baǵytqa qosymsha 15 avtobýs shyǵarady. Avtobýstyń júrý syzbasy: Temirjol vokzaly - Birjan sal kóshesi - Esenberlın kóshesi - Respýblıka dańǵyly - Qabanbaı batyr dańǵyly - «Astana - Qosshy» tas jolymen - «Altyn taǵa» bazaryna deıin. Avtobýs keri baǵytta osy syzba boıynsha júredi.

«Nur Astana» ortalyq meshitiniń Bas ımamy, Qazaqstan musylmandary dinı basqarmasynyń naıb múftıi Qalıjan qajy Zańqoevtyń aıtýynsha, aıt kúnderi áleýmettiń álsiz tobyna jatatyn jandarǵa mereke sezimin syılaý úshin «Altyn taǵa» mal bazarynda shalynatyn qurbandyq etteri Almaty, Saryarqa jáne Esil aýdandarynyń ákimdikteri usynǵan tizim boıynsha jaǵdaıy tómen jáne kóp balaly otbasylarǵa, qarttar úıine, múgedekter men zaǵıp jandarǵa úlestiriletin bolady. Qurbandyq maldardyń eti «Nur-Astana meshiti» (Qabanbaı batyr kóshesi 21) men «Sádýaqas qajy Ǵylmanı meshitinde» (Qoshqarbaev kóshesi, 95) taratylady.