Astanada kúnniń sýytýyna baılanysty sabaqtardyń toqtatylý parametrleri belgilendi
ASTANA. 5 jeltoqsan. QazAqparat - Astanaǵa bıyl qys kesh túskenimen, alty aıǵa sozylatyny bar. Ásirese, jeltoqsan, qańtar, aqpan aılary aıazymen erekshelenedi. Al, bul ýaqytta qalanyń bilim berý mekemelerinde ýaqytsha sabaq toqtatylady, dep jazady elordalyq resmı saıtta.
"Qys aılarynda kún sýytqan kezinde 1-4-synyp aralyǵynda -25 gradýs jáne odan tómen bolǵanda sabaq toqtatylady. -30 gradýs jáne odan tómen bolsa, 1-9-synyptarda, -35 gradýs jáne odan tómen bolsa, 1-11(12) synyptarda, kásiptik lıtseılerde, kolledjderde (1-2-kýrs stýdentteri úshin) sabaq toqtatylady", - deıdi Astana qalasy Bilim basqarmasy bóliminiń basshysy Mádına Súleımenova.
Sabaqty toqtatý habarlamasy tańerteńgi 6.30-dan 7-ge deıingi ýaqytta jáne túski 12.15-ten 12.45-ke deıingi aralyqta «31 kanal», «STV» arnalarynda júgirtpe joldar arqyly beriledi. Al «Eýrazııa», «Qazaqstan», «Habar» arnalary aqparatty daýystyq habarlamamen jetkiziledi.
Bul jumys oqýshylardyń qaýipsizdigin qamtamasyz etý úshin jasaldy. Al mektep baǵdarlamasynan qalyp qoıǵan pánder qosymsha sabaqtar arqyly ıgeriledi. Aıta ketý kerek, sabaqtyń toqtatylǵany týraly aqparatty 118-01, 169, 109 telefon nómirleri arqyly jáne Astana qalasynyń resmı saıty www.astana.gov.kz arqyly da alýǵa bolady.
