Astanada kúnine 90 sábı balabaqsha kezegin tolyqtyryp otyr
ASTANA. QazAqparat - Astanada kún saıyn 90 bala balabaqsha kezegin tolyqtyryp otyr. Bul týraly qalalyq Bilim basqarmasynyń basshysy Qasymhan Senǵazyev málim etti, dep habarlaıdy QazAqparat.
«Astanada kúnine 70-75 sábı dúnıege keledi, kún saıyn 80-90 búldirshin balabaqsha kezegine turady. Eger de jekemenshik balabaqsha ashamyn degen kásipkerlerdiń ótinish-tilekterin tyńdamasaq, 2020 jylǵa deıin balalardyń barlyǵyn 100 paıyz balabaqshamen qamtamasyz etemiz degen jospardy oryndaı almaımyz»,-dedi Q.Senǵazyev.
Aıta keteıik, Ulttyq kásipkerler palatasynda ótken jınalysta kásipkerler balabaqsha ashý úshin memlekettik organdar tarapynan qoıylatyn normalar men erejeler óte kóp ekenin aıtqan bolatyn.
Q.Senǵazyevtyń aıtýynsha, jaqynda ǵana memlekettik-jekemenshik áriptestik júıesi boıynsha balabaqsha ashý úshin 10 joba konkýrsqa salynǵan eken. Onyń tek altaýy maquldandy, al qalǵan tórteýine eshbir kásipker qyzyqpaǵan. Sebebi, ol jobalardyń quny óte qymbat bolyp shyqqan.
