Astanada quny 354 mln dollar bolatyn data-ortalyq kampýsy salynyp jatyr
ASTANA. KAZINFORM — Astanada jasandy ıntellekt pen tsıfrlyq servısterge qajetti ınfraqurylymdy damytýǵa baǵyttalǵan Akashi Data Center kampýsynyń qurylysy júrip jatyr. Jobaǵa 354 mln dollar ınvestıtsııa salynyp, 11 gektardan astam aýmaqty qamtıtyn nysannyń jalpy jobalyq qýaty 100 MVt-qa deıin jetedi.
Búgin nysanda BAQ ókilderine arnalǵan alǵashqy jabyq tehnıkalyq baspasóz týry ótti. Jýrnalısterge qurylystyń qazirgi kezeńi, energetıkalyq ınfraqurylym jáne bolashaq data-ortalyqtyń múmkindikteri tanystyryldy.
Qazir kampýsta alǵashqy DC-1 modýliniń jalpy qurylys jumystary aıaqtalýǵa jaqyn. Injenerlik júıelerdi montajdaý kezeńi bastalǵan. Qosalqy stantsııaǵa qajetti negizgi elektr jabdyqtary ornatylyp, nysanǵa jeke elektr jelisi tartylǵan.
Jobanyń alǵashqy kezeńin 2027 jyly iske qosyp, alǵashqy iri klıentterdi ornalastyrý josparlanyp otyr. Al kampýstyń barlyq tórt modýli tolyq iske qosylǵanda, munda 4 myńnan astam serverlik sóre ornalastyrylady.
Kompanııa ókilderiniń aıtýynsha, data-ortalyqtyń negizgi baǵyty — bultty servıster, joǵary ónimdi esepteýler jáne jasandy ıntellekt tehnologııalaryna qajetti ınfraqurylymdy usyný.
— Dúnıejúzilik tájirıbege qarasaq, Ortalyq Azııa naryǵynda derekterdi óńdeý ortalyqtary boıynsha úlken múmkindik bar. Osy naryqtaǵy bos keńistikti dál osy data-ortalyqtar toltyra alady. Óıtkeni IT-ınfraqurylymdy damytý úshin, eń aldymen, zamanaýı derekterdi óńdeý ortalyqtaryn salý qajet. Bul elimizge úlken ekonomıkalyq paıda ákeledi. Sheteldik IT-kompanııalar Qazaqstanǵa kelip, óz jobalaryn ornalastyrsa, jańa ınvestıtsııalar tartylyp, ekonomıkanyń damýyna serpin beredi, — dedi Akashi Data Center kommertsııalyq dırektory Erasyl Aıýbekov.
Jobanyń alǵashqy DC-1 modýliniń jobalyq qujattamasy Uptime Institute halyqaralyq uıymynyń Tier IV Design standarty boıynsha sertıfıkattalǵan. Bul data-ortalyqtyń úzdiksiz jumysyn qamtamasyz etýge arnalǵan rezervtik júıeler qarastyrylǵanyn bildiredi.
Kampýstyń keıingi modýlderiniń biri joǵary tyǵyzdyqtaǵy jasandy ıntellekt esepteýlerine beıimdelmek. DC-4 modýliniń IT-júktemesi 30 MVt-qa deıin eseptelgen jáne onda suıyqtyqpen salqyndatý tehnologııalaryn qoldaný josparlanǵan.
Joba ókilderiniń aıtýynsha, jańa data-ortalyqtyń iske qosylýy halyqaralyq tehnologııalyq kompanııalardyń Qazaqstan naryǵyna kelýine jáne eldegi tsıfrlyq ınfraqurylymnyń damýyna qosymsha múmkindik beredi.
Aıta keteıik, buǵan deıin Memleket basshysy Qasym-Jomart Toqaev Alem.ai bazasynda «Ortalyq Azııa — Koreıa» ozyq tehnologııalar ortalyǵyn qurýdy usyndy.
