Astanada quny 2,7 trln teńge bolatyn 380 joba prokýrorlardyń baqylaýynda
ASTANA. KAZINFORM – Investorlardyń quqyqtaryn qorǵaý komıtetiniń tóraǵasy Aqmola oblysy men Astanadaǵy ınvestıtsııalyq nysandardy aralady, dep habarlaıdy QR Bas prokýratýrasynyń baspasóz qyzmeti.
Bas prokýratýranyń Investorlardyń quqyqtaryn qorǵaý komıtetiniń tóraǵasy Baýyrjan Eraly «Aqmola» ındýstrııalyq aımaǵyna jáne Orbis Heavy Machinery zaýytyna jumys saparymen bardy.
Sapar barysynda ol ınvestıtsııalyq jobalardyń iske asyrylý barysymen tanysyp, kásiporyn basshylarymen ınvestorlardy súıemeldeý, ákimshilik kedergilerdi joıý jáne memlekettik organdarmen ózara is-qımyl máselelerin talqylady.
«Aqmola» ındýstrııalyq aımaǵynda sıngapýrlyq Eagle Architecture Technology kompanııasynyń avtoklavty gazbeton bloktaryn, PVH jáne alıýmınııden jasalǵan qasbettik júıelerdi, vıtrajdyq konstrýktsııalar men bıtýmdy gıdrooqshaýlaǵysh materıaldardy óndiretin zaýyttyń qurylysy jalǵasyp jatyr.
Aqmola oblysy ákimdiginiń ótinishi boıynsha Komıtet «Aqmola Invest» uıymymen birlesip, ındýstrııalyq aımaqtyń ınjenerlik-kommýnaldyq ınfraqurylym jobalaryna memlekettik saraptamanyń júrgizilýin qamtamasyz etti. Bul ınvestıtsııalyq jobalardy qajetti ınfraqurylymmen ýaqytyly qamtamasyz etýge jáne olardyń iske asyrylýyn jedeldetýge múmkindik berdi.
Sondaı-aq tóraǵa Orbis Heavy Machinery zaýytynda boldy. Buǵan deıin kompanııanyń ótinishi boıynsha prokýratýra organdary ınvestıtsııalyq jobanyń ekinshi kezeńin iske asyrýǵa kedergi keltirgen ákimshilik tosqaýyldy joıǵan bolatyn. Sý qorǵaý aımaǵynyń shekarasy naqtylanǵannan keıin ınvestor arnaıy tehnıkany qurastyrý zaýytynyń qurylysyn jalǵastyrýǵa múmkindik aldy.
-Búginde komıtet 3 myńnan astam ınvestıtsııalyq jobany súıemeldeýde. Árbir jobaǵa jeke prokýror bekitilgen. Bizdiń basty mindetimiz – ákimshilik kedergilerdi jedel joıý jáne ınvestorlardyń quqyǵyn qorǵaý. Tek Aqmola oblysynyń ózinde jalpy quny 2,5 trln teńgeni quraıtyn 182 joba, al Astana qalasynda jalpy quny 2,7 trln teńge bolatyn 380 joba súıemeldenip jatyr, – dedi Baýyrjan Eraly.
Osyǵan deıin Mańǵystaýda prokýratýra iri ınvestordyń quqyǵyn qorǵaǵany týraly jazdyq.
