Astanada quny 20 mln teńgeden asatyn 4 tonna nasybaı tárkilendi
ASTANA. KAZINFORM – Elordanyń barlyq aýdandarynda 18 naýryzdan bastap veıp pen nasybaıdyń zańsyz taralýy men qoldanylýyn anyqtaý boıynsha reıdter júrgizilip jatyr. Polıtseıler aýdan ákimdikteriniń ókilderimen birlesip saýda núktelerin tekserip, taratýshylardy ákimshilik jaýapkershilikke tartady.
Elorda ákimdigi saıtynyń habarlaýynsha, reıd bastalǵannan beri Astananyń bes aýdanynda 800-den astam saýda núktesi tekserildi. Polıtsııa departamentiniń qyzmetkerleri aýdan ákimdikterimen birlesip shekpeıtin temeki ónimderin, onyń ishinde nasybaı óndirisi boıynsha jerasty tsehtaryn satýdyń 150-den astam faktisin anyqtady.
Astana boıynsha quny 20 mln teńgeden asatyn 4 tonna nasybaı tárkilendi. Atalǵan ónimder joıyldy.
Almaty aýdanyndaǵy reıd barysynda polıtseıler 57 faktini anyqtady, onyń ishinde:
- Shekpeıtin temeki ónimderin satýdyń 42 faktisi (nasybaı) tirkeldi. Barlyq faktiler boıynsha 25 AEK mólsherinde aıyppul túrinde ákimshilik jaza qoldanylyp, QR ÁQBtK-niń 196-baby boıynsha ákimshilik hattamalar jasaldy.
- Mekemelerde temeki ónimderin (kalıan) tutynýdyń 14 faktisi tirkeldi. QR ÁQBtK-niń 441-baby boıynsha 15 AEK mólsherinde aıyppul túrinde ákimshilik jaza qoldanýmen ákimshilik hattamalar toltyryldy.
- Jıyrma bir jasqa tolmaǵan adamdarǵa temeki buıymdaryn satý faktisi tirkeldi. QR ÁQBtK-niń 423-1-baby boıynsha 15 AEK mólsherinde aıyppul túrinde ákimshilik jaza qoldanylyp, ákimshilik hattama jasaldy.
Saryarqa aýdanynda reıd bastalǵannan beri 60-tan astam buzýshylyq anyqtalyp, 30 kelige jýyq nasybaı tárkilendi.
Baıqońyr aýdanynda jedel-profılaktıkalyq is-sharalar barysynda 180-nen astam saýda núkteleri tekserilip, shekpeıtin temeki ónimderin satýdyń 6 faktisi anyqtaldy. Polıtsııa qyzmetkerleri kásipkerlerge qatysty QR ÁQBtK 196-baby men 423-baby 1-bóligine sáıkes, 25 AEK (92 300 teńge) somasyna aıyppul túrinde ákimshilik sharalar qabyldady.
Esterińizge sala keteıik, Astanada 4 tonna nasybaı tárkilendi, onyń quny 20 mln teńgeden asady. Tárkilengen barlyq ónim joıyldy. Elordanyń saýda núkteleri boıynsha reıdter kún saıyn ótedi.
Memleket basshysy Ulttyq quryltaıdyń III otyrysynda nasybaı óndirýshileri men dıstrıbıýtorlary úshin zańnamalyq shekteýler qoıýdy tapsyrǵanyn atap ótken jón. Prezıdenttiń tapsyrmasy aıasynda Astananyń barlyq bilim berý uıymdarynda túsindirý jumystary júrgizilýde. Barlyq mektepterde «jaman ádetter jáne olardyń densaýlyqqa áseri» taqyrybynda synyp saǵattary ótkizildi, tehnıkalyq jáne kásiptik bilim berý uıymdarynda adam aǵzasyna nasybaıdyń zııany týraly egjeı-tegjeıli baıandalǵan kýratorlyq saǵattar men dóńgelek ústelder ótkizildi.
