Astanada kúndelikti 886 avtobýs halyqty tasymaldap júr

NUR-SULTAN. QazAqparat – Nur-Sultan qalalyq City Transportation Systems (CTS) kólik kompanııasy avtobýs qozǵalysy týraly túsinik berdi, dep habarlaıdy QazAqparat tilshisi.

«Qalada ásirese tańerteń qoǵamdyq kóliktiń qozǵalysy baqylanbaıdy. Jolaýshylar keptelis kezinde qosymsha avtobýs shyǵarýdy surap jatady. Bul máseleni qalaı sheshýge bolady?», - degen saýal joldady QazAqparat tilshisi atalǵan mekemege.

Kólik kompanııasy tańerteń jáne keshki ýaqytta múmkindiginshe jıi qozǵalys ıntervalymen barlyq avtobýstyń jolǵa shyǵatynyn jetkizdi.

Al aralyq ýaqytta (túski ýaqyt) júrgizýshiler úshin qarastyrylǵan kólik quraldarynyń tehnıkalyq toqtap qalýyna baılanysty qozǵalys aralyǵy azdap artady (tamaqtaný, sanıtarlyq gıgıena jáne taǵy basqa).

«Búginde qala boıynsha kúndelikti 886 avtobýs qatynaıdy. Onyń ishinde 802 marshrýt qala ishinde jáne 84 avtobýs qala mańyna júredi. Ótken jyly 6 jańa marshrýt iske qosylyp, 20 qoǵamdyq kóliktiń júrý kestesi jaqsartyldy. 31 kóshe men 18 aýdan boıynsha qoǵamdyq kólik máselesi sheshildi. Odan bólek 9 marshrýttaǵy jyljymaly quram jańartylyp, ózgertý jáne jańa marshrýttardy iske qosý esebinen qalalyq kóliktik qyzmet kórsetýdi qamtý ulǵaıtyldy»,- dep jaýap berdi CTS baspasóz qyzmeti.