Astanada kún saıyn balabaqsha kezegine 90 bala turady
ASTANA. QazAqparat - Qala ákimdigi mektep pen balabaqshalarda oqýshylar men balǵyndardyń kóptigi máselesin keshendi túrde sheshýde, dep habarlaıdy QazAqparat.
Qala ákimdigi saıtynyń habarlaýynsha, elordada 130 542 oqýshy oqıtyn 95 jalpy bilim beretin mektep jumys isteıdi. Olardyń 84-i memlekettik mektep, onda 126 917 bala oqıdy, 11-i jeke mektep, onda 3 625 oqýshy bilim alady. 2016-2017 oqý jylynda qalanyń 27 mektebinde oqýshylardyń sany belgilengen esepten kóptigi saqtalǵan, onyń 3 bilim ordasynda úsh aýysymdy sabaq júrgizilgen. Osylaısha 9 588 oqýshy orny jetispegeni baıqaldy.
1-shi synypqa kelgen oqýshylardyń sany (boljam boıynsha 22 000 oqýshy) kúrt ósýine jáne kóshi-qonǵa (boljam boıynsha 4 500 oqýshy) baılanysty, 2017-2018 oqý jylynda boljam boıynsha 17 myń oqýshy orny jetispeı qalýy ábden múmkin.
Osyǵan baılanysty 2017-2018 oqý jylynda 2 600 orynǵa arnalǵan japsarlas salynǵan 5 mektepti paıdalanýǵa berý josparlanýda. Qazirgi ýaqytta 11 100 orynǵa arnalǵan 10 mekteptiń qurylysy bastaldy, ol 2018 jyly paıdalanýǵa beriledi dep josparlanýda.
2018-2019 jj. salynatyn 13 mekteptiń jobasyn jasaý jumysy júrgizilýde. Elordada 263 mektepke deıingi mekeme, onyń ishinde 96 memlekettik jáne 2 vedomstvalyq, 116 jeke jáne 49 shaǵyn ortalyq jumys isteıdi. 2017 jyldyń 1 shildesindegi jaǵdaı boıynsha, 3-6 jas aralyǵyndaǵy 33 240 bala mektepke deıingi mekemeden oryn alý kezeginde tur. Mektepke deıingi balalardyń sany týý men kóshi-qon kórsetkishiniń joǵary deńgeıine baılanysty artyp otyr. Kún saıyn balabaqsha kezegine ortasha eseppen 90 bala turady (60-70 sábı dúnıege keledi, 20 bala kóshi-qon esebi arqyly).
2017 jyly 480 oryndyq 2 memlekettik balabaqsha, MJS aıasynda 720 oryndyq 3 balabaqsha paıdalanýǵa beriledi. Sondaı-aq balabaqshalardy salý boıynsha jeke seriktesterdi anyqtaý jóninde baıqaý ótkizildi. Qazirgi ýaqytta 2019 jyly paıdalanýǵa beriletin 1 680 oryndyq balabaqsha boıynsha 6 jospar iske asyrylýda. Bilim basqarmasymen jyl saıyn memlekettik tapsyryspen 10 000 oryndyq jeke balabaqsha ashý josparlanýda.
Esterińizge sala keteıik, 28 maýsymda Áset Isekeshev Elbasynyń qabyldaýynda boldy. Kezdesý barysynda Prezıdent elorda turǵyndarynyń tirshilik áreketine baılanysty birqatar tapsyrma berdi.
Memleket basshysy elorda turǵyndarynyń sany kúnnen kúnge kóbeıip kele jatqanyn basa aıtty, osy oraıda oqýshylar men mektep jasyna deıingi balalardy bilim ordasymen, balabaqshamen qamtamasyz etý máselesin tilge tıek etti.
