Astanada kún saıyn 30-dan astam bala qyzylsha juqtyryp jatyr

Astana qalasynyń bas sanıtar dárigeri Sarhat Beısenova elordadaǵy epıdahýal týraly málimet berdi, dep habarlaıdy Kazinform. 

«Elordada kún saıyn qyzylshanyń 35-ke jýyq jaǵdaıy tirkeledi. 2023 jyldyń naýryz aıynan bastap qyzylshanyń 2 537 bastapqy jaǵdaıy tirkeldi. Onyń ishinde 806 jaǵdaı rastalǵan dıagnoz jáne onyń 71 paıyzy (570 jaǵdaı) 14 jasqa deıingi balalar arasynda tarap otyr. Naýqastardyń 9 paıyzy (75 jaǵdaı) – jasóspirimder, 20 paıyzy (161 jaǵdaı) – eresekter. Naýqastar arasynda vaktsına almaǵan balalardyń úlesi 70 paıyz (556) jáne 24 paıyzy – egý mártebesi belgisiz eresekter. Ekpe alyp, keıin aýyryp qalǵan balalardyń úlesi 6 paıyz ǵana. Ókinishke qaraı, qyzylsha juqtyrǵan naýqaspen tyǵyz baılanysta bolǵan adamdardyń vaktsınadan bas tartqan jaǵdaılary bar. Qyzylshamen aýyrǵandardyń ishinde 48 paıyzy nemese 267 bala vaktsınatsııaǵa senbegendikten, 27 paıyzy (151) - medıtsınalyq qarsy kórsetilimge baılanysty, 17 paıyzy (98) – ekpe jasyna jetpeýine baılanysty jáne 7 paıyzy ata-analarynyń nemquraılylyǵy sebebinen vaktsına almaǵan», - dedi ol óńirlik kommýnıkatsııalar qyzmetinde ótken brıfıngide.

Sondaı-aq ol qyzylshaǵa qarsy vaktsına medıtsınada keıingi 60 jyl boıy qoldanylyp kele jatqanyn eske saldy.

«Sol sebepti men ata-analardy balalaryna der kezinde qyzylshaǵa qarsy ekpe saldyrtýǵa shaqyramyn. 6-10 aılyq jáne 2-5 jas aralyǵyndaǵy balalarǵa qosymsha ımmýnızatsııa alý qajet», - dedi Sarhat Beısenova.