Astanada kún kúrt sýytyp, qatty jel soǵady - Qazgıdromet
ASTANA. QazAqparat - Elordaǵa tsıklon kele jatyr. Osyǵan qaraı Astanada aýa temperatýrasy kúrt tómendeıdi, dep habarlady búgin elorda ákimdiginiń medıa ortalyǵy.
«Qazgıdromet ortalyqtyń» habarlaýynsha, 5 qyrkúıek Astanada naızaǵaı oınap, burshaq jaýyp, ońtústik-shyǵystan sekýndyna 15-20 metr bolatyn qatty jel esedi dep kútilýde.
Aýa raıy 6-7 qyrkúıek kúnderi kúrt salqyndaıdy dep boljanýda.
Sınoptıkter búgin saǵat 18:00-dar shamasynda RF Ýfa qalasynan tsıklon Qostanaı oblysyna taıaǵanyn naqtylady. Ary qaraı shyǵys baǵytynda Aqmola oblysynyń batysyna oıysty. 5 qyrkúıek tańerteń 06:00-de Aqmola oblysynyń batys bóligine jyljıdy. Sol sebepti jańbyr jaýyp, naızaǵaı jarqyldaıdy.
Jańbyrdyń kóp mólsherde túsýine baılanysty elorda kóshelerin, jeke turǵyn úı sektorlaryn, jerasty ótkelderin sý basýy yqtımal, sondaı-aq jeldiń ekpini qatty bolatyndyqtan aǵashtar qulaýy múmkin. Osyǵan baılanysty qalanyń kommýnaldyq qyzmeti kúsheıtilgen rejımde jumys isteıdi.
Astana basshylyǵy elorda turǵyndary men qonaqtaryn qaýipsizdik sharalaryn barynsha muqııat saqtaýǵa shaqyrady jáne kútpegen jerden tótenshe jaǵdaı oryn alǵan jaǵdaıda, 109 qalalyq biryńǵaı qyzmetine dereý habarlasýdy suraıdy.
