Astanada qýlyqpen paıda tapqan taksıster jumystan shyǵarylady
ASTANA. QazAqparat - Astana qalalyq tasymaldaýshylar qaýymdastyǵynyń tóraǵasy Medet Qurmanov «ASTANA TAXI» qyzmetine aıtylǵan shaǵymdarǵa qatysty jaýap berdi, dep habarlaıdy «QazAqparat» HAA tilshisi.
«Facebook» qoldanýshysy Arman Ábdirasylov áleýmettik toptardyń birinde eseptegishpen jumys isteýdi qalamaıtyn Biryńǵaı taksı qyzmeti júrgizýshilerine shaǵymdanǵan bolatyn. Ol jazbasynda eseptegishtiń tipti joqtyǵyn alǵa tartqan.
«Aıtylǵan faktilerdiń tirkelýi ábden múmkin. Bul bizdiń atqaryp jatqan jumystarymyzǵa qaıshylyq týdyrady. Jalpy alǵanda, biz búgin ASTANA TAXI jumysynda kemshilikterdiń bar ekendigin moıyndaımyz. Sondyqtan da qyzmet kórsetý sapasyn jaqsartý boıynsha jumystar kún saıyn júrgiziledi», - dep jaýap berdi Medet Qurmanov.
Onyń aıtýynsha, júrgizýshiler kompanııanyń erejeleri men talaptaryn óz betinshe elegisi kelmeı, tarıfti qymbattatyp, taksometrlerdi qospaı jatady.
«Olardy jumystan bosatýǵa deıingi qatań sharalar qoldanylady, biraq barlyq klıentterdiń oıy bir jerden shyqpaýy da múmkin. Al keıbir klıentterdiń ózderi belgilengen tarıf boıynsha júrýdi qalaıdy. Mundaı faktiler anyqtalǵannan keıin birden habarlanýy kerek», - dedi Qurmanov.
Astana qalalyq tasymaldaýshylar qaýymdastyǵynyń tóraǵasynyń aıtýynsha, búgingi tańda Biryńǵaı taksı qyzmetinde 8 taksomotorlyq kompanııa bar, sondyqtan júrgizýshilerge baqylaýdy taksoparkterdiń ózderi júrgizedi.
Buǵan qosa Qurmanov basqalardan góri resmı tasymaldaýshylardyń qyzmeti nelikten qymbat ekenin túsindirdi.
«Birinshiden, ol qyzmetterdiń qaýipsizdigi men sapasyn talap etýge bolatyn, Ádilet departamentinde tirkelip, jolaýshylardy tasymaldaý úshin ruqsat alǵan naqty kompanııa bolyp tabylady. Jolaýshylar jol apaty tirkelgen jaǵdaıda (densaýlyǵyna nemese qundy zattaryna keltirilgen zııan úshin ótemaqy ala alady) saqtandyrylǵan. Taksı ortalyǵynda paıdalanǵanyna 2-5 jyl bolǵan kólikter qyzmet kórsetedi» - deıdi Medet Qurmanov.
Aıta keterligi, «ASTANA TAXI» biryńǵaı taksı qyzmeti 2017 jyldyń mamyr aıynda engizilgen. Qyzmet jeke kompanııalardyń ınvestıtsııalary men Astana qalasy ákimdiginiń memlekettik qoldaý esebinen júzege asyrylady.
