Astanada «Qulpyrǵan kóktem» atty sýretshiler kórmesi ótedi
ASTANA. QazAqparat - 5 naýryz kúni saǵat 16.00-de Halyqaralyq áıelder kúni merekesine oraı Nazarbaev ortalyǵynda «Qulpyrǵan kóktem» atty sýretshiler kórmesi ashylady. Oǵan elordanyń 13 sýretshi arýlarynyń tól týyndysy qoıylady, dep habarlaıdy atalmysh mekemeniń baspasóz qyzmetinen.
Kórmege qoıylatyn sýretshi arýlarymyzdyń qylqalamynan shyqqan kartınalarynda áıel zatynyń sulýlyǵy aıqyn seziledi. Olardyń asa názik, erekshe rýhanı tanymynan týǵan týyndylary san qyrlylyǵymen jáne qarama-qaıshylyǵymen kózge túsedi. Óıtkeni, sýretshi qyzdarymyz bul týyndylarynda sulýlyqtyń estetıkalyq tanymy men sezim tuńǵıyǵyna súıenedi.
Kórmege kórkemóner týyndylarymen qatar, sándik qolóner týyndylary da qoıylady. Ónersúıer qaýymnyń nazaryna A.Ábjanova, A.Alpysbaeva, R.Ahmetjanova, A.Esimova, L.Janpeıisova, N.Lıgaı, D.Nýger, E.Ralına, V.Slabospıtskaıa, A.Kólke, G.Tátibaeva, G.Telǵozıeva, N.Tereşenko syndy qylqalamdy serik etken óner ıeleriniń shyǵarmalary usynylady.
Bul eńbekter elimizdegi qazirgi zamanǵy ónerdiń baǵyty men negizgi stılin aıqyndaıdy.
