Astanada Quqyq qorǵaý organdary akademııasynyń qalyptasý perspektıvalary talqylandy
Bas prokýratýranyń baspasóz qyzmeti habarlaǵandaı, onyń jumysyna Úılestirý keńesiniń músheleri, Prezıdent Ákimshiliginiń, Premer-Mınıstr Keńsesiniń, quqyq qorǵaý jáne arnaıy memlekettik organdardyń jaýapty qyzmetkerleri, Parlament depýtattary qatysty.
Jıyn barysynda kúsh qurylymdaryndaǵy vedomstvolyq bilim berýdi odan ári jetildirýdiń perspektıvalaryna, Quqyq qorǵaý organdary akademııasy qyzmetiniń negizgi baǵyttaryna taldaý jasaldy, oqý ornynyń qalyptasýy aıasynda tıimdi vedomstvoaralyq ózara is-qımyl jasasý boıynsha usynystar ázirlendi.
Jınalysty asha otyryp Bas prokýror atap ótkendeı, aǵymdaǵy jyldyń mamyr aıynda Memleket basshysynyń Jarlyǵymen qurylǵan Qazaqstan Respýblıkasy Bas prokýratýrasynyń janyndaǵy Quqyq qorǵaý organdary akademııasy quqyq qorǵaý júıesin jańǵyrtýdyń mańyzdy býynyna aınaldy.
A.Daýylbaev elimizdiń Prezıdenti aldymyzǵa qoıǵan kadrlyq áleýettiń sapasyn arttyrý, quqyq qorǵaý júıesi qyzmetkerleriniń qataryn laıyqty túrde tolyqtyratyn zańgerlerdiń jańa tolqynyn oqytý jáne tárbıeleý jónindegi mindetterdi tıimdi júzege asyrýdy tapsyrdy.
Májiliske qatysýshylar quqyq qorǵaý organdarynyń aldynda turǵan keleli mindetterdiń biri - kadrlyq quramdy qalyptastyrý jáne nyǵaıtý bolyp tabylatyndyǵyna erekshe nazar aýdardy. Túptep kelgende, zańdylyq pen quqyqtyq tártipti nyǵaıtý jónindegi jumystyń tıimdiligi, sondaı-aq azamattardyń senim bildirý deńgeıi qyzmetkerlerdiń kásibı sheberligi men quzirettiligine, olardyń iskerlik jáne adamgershilik qasıetterine tikeleı baılanysty bolyp tabylady.
Sondyqtan da, osynaý jańa oqý ornynyń dúnıege kelýin ýaqyttyń ózi talap etti jáne ol quqyq qorǵaý júıesiniń aldyńǵy qatarly bilim berý jáne ǵylymı ortalyǵyna, ǵalymdar men is basyndaǵy mamandardyń tájirıbe almasar alańyna aınalýy tıis.
Akademııanyń negizgi baǵyttary retinde Prezıdenttik rezervte turǵan quqyq qorǵaý organdarynyń basshylyq quramyn qosa alǵandaǵy quqyq qorǵaý organdary qyzmetkerleriniń kásibı deńgeıin arttyrý, quqyq qorǵaý qyzmeti salasynda vedomstvoaralyq ǵylymı zertteýler júrgizý jáne úılestirý, sondaı-aq joǵary oqý ornynan keıingi bilim berý baǵdarlamalaryn iske asyrý bolyp anyqtalǵan.
Oqytý baǵdarlamasy tyńdaýshylarǵa qajetti teorııalyq bilim berýmen ǵana shektelmeıdi. Bilim berý baǵdarlamalary eń aldymen tájirıbe barysyndaǵy suranysqa jáne árbir quqyq qorǵaý organy jumysynyń ereksheligine baǵdarlanǵan. Sonymen qatar baǵdarlamalar quqyq qorǵaý júıesin biryńǵaı ǵylymı turǵydan qamtamasyz etýge, sondaı-aq qoldanbaly zertteýlerdiń nátıjelerin praktıkalyq qyzmet barysynda paıdalanýǵa múmkindik beredi. Osylaısha, tájirıbemen ushtastyrylǵan mamandandyrylǵan daıarlyq eńbekke aralasqan jas mamannyń kásibı shyńdalýyna jol ashyp, onyń eńbek ónimdiligin arttyrýyna yqpal etpek.
Talqylaý qorytyndysy boıynsha Úılestirý keńesi Akademııanyń aldynda turǵan vedomstvoaralyq ǵylymı jáne bilim berý qyzmetterin damytý jónindegi mindetterdi sheshýge baǵyttalǵan kelisilgen sheshimder qabyldady. Kásibı daıarlyq júıesin jetildirý, kadrlardyń biliktiligin arttyrý, quqyq qorǵaý organdaryn ǵylymı turǵydan qamtamasyz etý boıynsha zańnamalyq jáne uıymdastyrýshylyq-praktıkalyq sharalar qabyldaý qajettiligi atap ótildi.
Árbir quqyq qorǵaý organynyń biliktilikti arttyrý jáne kadrlardy qaıta daıarlaý boıynsha qajettilikterin anyqtaý, qyzmetkerlerdiń quzirettilikterin baǵalaý jáne sertıfıkattaýdyń erejelerin normatıvtik bekitý, ǵylymı zertteýlerdiń taqyryptary jóninde dáıektemeler engizý usynyldy.
