Astanada «KitapTime-2026» V jalpy respýblıkalyq kitap festıvali ótti

QR Mádenıet jáne aqparat mınıstrliginiń qoldaýymen ótken festıvaldiń negizgi maqsaty – kitaphanaǵa jańa oqyrman tartý, kitap oqıtyn ult qalyptastyrý jáne qoǵamda oqý mádenıetin damytý.

QR Ulttyq akademııalyq kitaphanasynyń dırektory Kúmis Seıitovanyń aıtýynsha, festıvalge stýdentter, oqýshylar men qala turǵyndary qatysty.

— «KitapTime» bıyl besinshi ret ótip jatyr. Sharanyń maqsaty da, mańyzy da – kitaphanaǵa oqyrman tartý, kitap oqıtyn ult qalyptastyrý jáne osy úrdisti odan ári óristetý. Festıvalge úlken daıyndyq júrgizildi. Búgin munda stýdentter, oqýshylar men qala turǵyndary jınaldy. Festıval aıasynda kitaphanada Serb ádebıeti buryshyn ashamyz. Astanadaǵy birneshe iri mekememen memorandýmǵa qol qoıamyz. Munyń bári kitapty nasıhattap, kitap oqýǵa qyzyǵýshylyqty arttyrý úshin jasalyp otyr, — dedi Kúmis Seıitova.

Festıvaldiń ashylýynda QR Mádenıet jáne aqparat mınıstrligi Arhıv, qujattama jáne kitap isi komıteti basqarmasynyń basshysy Almaz Myrzahmet, memleket jáne qoǵam qaıratkeri Nurtóre Júsip, Brazılııa Federatıvtik Respýblıkasynyń Qazaqstandaǵy Tótenshe jáne Ókiletti Elshisi Marsel Fortýna Bıato, QR Jazýshylar odaǵy Astana fılıalynyń dırektory Baýyrjan Babajanuly jáne «Bilte» ádebı agenttiginiń negizin qalaýshy Edige Qojahmet sóz sóıledi.

Almaz Myrzahmet elimizdiń óńirlerinde kitap oqý marafony ótip jatqanyn aıtyp, oǵan eki mıllıonǵa jýyq oqyrman qatysady dep kútilip otyrǵanyn jetkizdi.

Festıvaldegi basty jańalyqtardyń biri – Serb ádebıeti buryshynyń ashylýy boldy. Jańa burysh qazaqstandyq oqyrmandardy serb ádebıeti men mádenıetimen jaqynyraq tanystyrýdy kózdeıdi.

Serb ádebıeti buryshynyń ashylýyna Serbııa Respýblıkasynyń Qazaqstandaǵy Tótenshe jáne Ókiletti Elshisi Vladımır Iovıchıch, QR Ulttyq akademııalyq kitaphanasynyń dırektory Kúmis Seıitova jáne aqyn, dramatýrg Baıanǵalı Álimjanov qatysty.

Kúmis Seıitovanyń aıtýynsha, Serb ádebıeti buryshy eki eldiń ulttyq kitaphanalary arasyndaǵy yntymaqtastyq aıasynda ashylǵan.

— Prezıdent Qasym-Jomart Toqaevtyń Serbııaǵa resmı sapary aıasynda Serbııa Ulttyq kitaphanasymen memorandýmǵa qol qoıǵan edik. Sol memorandýmnyń nátıjesinde búgin QR Ulttyq akademııalyq kitaphanasynyń bir buryshy serb eliniń tanymal qalamgerleriniń eńbekterimen tolyqty. Bul eki el arasyndaǵy dostyq qarym-qatynasty odan ári nyǵaıtyp, kitaphanaǵa jańa oqyrman tartýǵa septigin tıgizedi dep úmittenemiz, — dedi Kúmis Seıitova.

Sonymen qatar festıval aıasynda Ulttyq akademııalyq kitaphana «Qazaqstan» ulttyq telearnasymen jáne Astana qalasy ákimdiginiń «Jastar» teatrymen yntymaqtastyq týraly memorandýmdarǵa qol qoıdy.

«Jastar» teatrynyń dırektory, aqyn Maqpal Mysa kitaphana men teatr arasyndaǵy baılanystyń mańyzyna toqtaldy. Onyń aıtýynsha, teatr repertýaryndaǵy birqatar qoıylym ádebı shyǵarmalar negizinde sahnalanǵan. Ol buǵan deıin teatrdyń HH maýsymy «Shyńǵyshan» spektaklimen ashylǵan kezde Ulttyq akademııalyq kitaphana Shyńǵys hanǵa qatysty kitaptar qoıylǵan arnaıy kórme uıymdastyrǵanyn atap ótti.

Festıval aıasynda baspalardyń qatysýymen kitap kórme-jármeńkesi ótip, qolóner sheberhanalary, býkkrossıng pen bıblıorıng uıymdastyryldy. Sondaı-aq jasóspirimderge arnalǵan oqý zaly ashyldy.

Shara barysynda fılosofııa ǵylymdarynyń doktory Álibek Qajyǵalıulynyń «Zver v glýbıne» kitabynyń tusaýy kesildi. Jazýshy, fılologııa ǵylymdarynyń kandıdaty Iana Borızben shyǵarmashylyq kezdesý ótti. «Bilte» ádebı agenttiginiń negizin qalaýshy Edige Qojahmet oqyrmandarmen «Tanymdyq kitap ómirińdi ózgerte ala ma?» taqyrybynda ashyq suhbat qurdy.

Festıvaldegi «Bir kitaptyń áseri» jobasy aıasynda ánshi, pedagog Sveta Aıtbaeva, QR eńbek sińirgen qaıratkeri Ardaq Balajanova jáne jazýshy, medıa mamany Mıras Muqash oqyrmandarmen kezdesip, óz ómirlerine áser etken kitaptar týraly áńgimeledi.

Budan bólek, «Ózińdi tap – ózegińe oral!» taqyrybynda aǵartýshylyq tanystyrylymdar ótip, «Aýylǵa kitap» aktsııasy uıymdastyryldy.

Kúmis Seıitova bıyl kitap salasynda qolǵa alynatyn taǵy bir mańyzdy bastamaǵa toqtaldy.

— Eń mańyzdysy – bıyl Prezıdent Jarlyǵyna sáıkes kitap jáne kitap isine qatysty zańnama ázirlenedi. Bul da kitapty nasıhattap, oqý mádenıetin damytýǵa serpin beredi, — dedi kitaphana dırektory.

Festıvalge memleket jáne qoǵam qaıratkerleri, sheteldik dıplomatııalyq ókildikterdiń ókilderi, zııaly qaýym ókilderi, aqyn-jazýshylar, sýretshiler, qolóner sheberleri, stýdentter, oqýshylar, kitaphanashylar men oqyrmandar qatysty.

Buǵan deıin Qazaqstan halyqaralyq kitap baıqaýynda toǵyz júldeli orynǵa ıe bolǵanyn jazǵan edik.