Astanada kishi Taldykóldegi ekoparkti abattandyrý jumysy bastaldy
ASTANA. KAZINFORM — Astana qalasynyń ákimi Jeńis Qasymbek Instagram paraqshasynda kishi Taldykól mańaıynda abattandyrý jumysy júrip jatqany týraly jazdy.
— Elordamyzdy kógaldandyrý jáne kórkeıtý jumysyn aýqymdy júrgizip jatyrmyz. Bıyl 170-ten astam aýla men qoǵamdyq oryndy (saıabaqtar, gúlzarlar, jelekjoldar) abattandyramyz. Sondaı-aq, bıyl 1,1 mıllıonnan astam jasyl jelek (kóshetter, butalar, aǵashtar) otyrǵyzamyz. Abattandyrý jumysy Astananyń barlyq aýdanyn qamtıdy, — dedi ol.
Qalanyń mańyzdy jobalarynyń biri — kishi Taldykóldegi ekopark. Abattandyrý jumysy kezeń-kezeńimen júrgiziledi.
— Qazir aýmaqta daıyndyq jáne ınjenerlik jumys bastaldy. Joba aıasynda sý qoımasynyń jekelegen ýchaskelerin tazartý, túbin tereńdetý jumysy, aýmaqty daıyndaý jáne bolashaq ekoparktiń bazalyq ınfraqurylymyn qalyptastyrý jumysy júrip jatyr, — dep jazdy qala basshysy.
Bıyl mynadaı is-sharalar josparlanyp otyr:
— súzgi júıesi bar tehnıkalyq bólmelerdiń qurylysy;
— akvatorııada sý deńgeıin saqtaý úshin uńǵymalardy iske qosý;
— alǵashqy serýendeý baǵyttaryn qurý;
— aýmaqty aýqymdy kógaldandyrýdy bastaý.
— Osy kúzde aǵashtar men jasyl jelekter otyrǵyzýdyń birinshi kezeńi bastalady. Jumys tabıǵı ortany jáne qoldanystaǵy landshafty barynsha saqtaı otyryp júrgiziledi, — dedi Jeńis Qasymbek.
Kelesi jyly josparlanyp otyrǵan is-sharalar:
— serýendeý baǵyttary men ekologııalyq jaıaý joldardy aıaqtaý;
— ýaqytty tynyshtyqta ótkizýge arnalǵan oryndar ashý;
— aýqymdy kógaldandyrý;
— aýmaqtyń tabıǵı ekojúıesin qorǵaý jáne saqtaý boıynsha sheshimderdi júzege asyrý.
— Jobanyń negizgi mindeti — qala irgesinde tabıǵatqa jáne bıoalýantúrlilikke zııan keltirmeı, ýaqytty tıimdi ótkizýge arnalǵan tabıǵı keńistik qurý, — dep jazdy Jeńis Qasymbek.
Aıta ketelik Kishi Taldykól ornynda salynatyn ekopark qurylysyna 4,5 mlrd teńge jumsalmaq ekeni týraly jazǵan edik.
