Astanada Kirister departamenti aýdıt bólimi basshysynyń úıinen 129,4 mln teńge tárkilendi

ASTANA. KAZINFORM – Astana qalasy Memlekettik kirister departamenti janama salyqtardy ákimshilendirý basqarmasynyń QQS (qosylǵan qun salyǵy) aýdıt bóliminiń basshysy ustaldy.

Bul týraly Sybaılas jemqorlyqqa qarsy is-qımyl agenttiginde ótken brıfıngide aıtyldy. 

«Sybaılas jemqorlyqqa qarsy qyzmet jasyryn is-sharalardyń nátıjeleri boıynsha aýyr jemqorlyq qylmys jasady degen kúdikpen Astana qalasy Memlekettik kirister departamenti janama salyqtardy ákimshilendirý basqarmasynyń QQS (qosylǵan qun salyǵy) aýdıt bóliminiń basshysyn ustady. Ol 36 mln teńge somasynda QQS qaıtarý boıynsha oń sheshim qabyldaǵany úshin kásipkerlik sýbektisinen 3,6 mln teńge somasynda para alǵan», - dedi Antıkordyń resmı ókili Danııar Bıgaıdarov agenttikte ótken baspasóz máslıhatynda. 

Onyń aıtýynsha, tintý barysynda onyń úıinen 129,4 mln teńge tárkilenip, tekserilip jatyr. 

«Kúdikti sottyń sanktsııasymen kúdikti 2 aı merzimge qamaýǵa alyndy. Tergeý jalǵasýda», - dedi ol. 

Buǵan deıin Jetisý oblysy Sarqan aýdany bilim bólimi bas býhgalteri iri kólemde aqsha jymqyrdy degen kúdikpen tergelip jatqanyn habarlaǵan edik. 

Aıta ketsek, Antıkor sý tasqynynyń saldaryn joıýǵa jáne aldyn alýǵa baǵyttalǵan bıýdjet qarajatyn bólý jáne onyń jumsalý barysyna monıtorıng júrgizedi.