Astanada krossfıtten halyqaralyq chempıonat bastaldy
ASTANA. QazAqparat - Q. Muńaıtpasov atyndaǵy ortalyq stadıonda krosfıtten kásipqoılar arasyndaǵy chempıonat jalaýyn kóterdi. Dúbirli doda elordamyzda ekinshi ret ótkizilip jatyr. Jarysta Qazaqstannyń aımaqtarynyń jáne reseılik atletter kúsh synasady. Bul týraly qalanyń resmı saıty habarlady.
- Krossfıttiń jyldan jylǵa damyp kele jatqanyn bilemiz. Atalǵan sport túrine áýes jandar sany kúnnen kúnge artyp keledi. Bul sport erekshe fılosofııany qajet etedi. Halyqaralyq týrnırge elimizdiń aımaqtary men Reseıden kelgen sportshylarǵa alǵysymdy bildiremin, - deıdi Astana qalasynyń dene tárbıesi jáne sport basqarmasynyń basshysy Berik Marjyqpaev.
Jarysqa qatysýshylar eki kún boıy dene jattyǵýlarynyń jeti túrinen saıysqa túsedi, sonyń ishinde aýyr atletıkalyq, gımnastıkalyq, kardıojattyǵýlar jáne basqalary bar.
- Krossfıt - adamnyń dene daıarlyǵyn jan-jaqty damytýǵa baǵyttalǵan sport. Naǵyz krossfıtter barlyq júktemelerge daıyn bolýy kerek. Osy kúnderi biz osyny tekseretin bolamyz, - dedi CrossFit Astana dırektory Erik Qarabaev.
Jarysta 50 jýyq atlet elordanyń namysyn qorǵaıdy. Týrnırge jaqynda ashylǵan «Temirtaý batyr» klýbynyń krossfıtteri qonaq retinde kelip otyr.
- Byltyr ótken týrnır bizdiń alǵashqy jarysymyz boldy. Óz baǵymyzdy synaýǵa keldik, sportqa berilip kettik. Onymen shyndap aınalysatyn boldyq. Bul erekshe sport, sportshy bárin bilýge tıis, jarysqa kelgende nebári bir aptanyń ishinde oǵan daıyndalyp úlgerýiń kerek. Basqa sport túrleri ondaı emes, - deıdi «Temirtaý batyr» klýbynyń qatysýshysy Vladıslav Terehın.
Aıta keteıik, erteń stadıonda chempıonattyń aqtyq syny ótedi. Al 20 tamyzda elordada CrossFit Astana Bolashak Cup 2016 korporatıvtik týrnıri, 27 tamyzda krossfıtten áýesqoılar arasyndaǵy jarys uıymdastyrylady. Oǵan 200 astam adam qatysady dep kútilýde.
