Astanada kirme jol qyzmetine tarıf bekitýge qatysty jarııa tyńdaý ótti
ASTANA. KAZINFORM – Astana qalasy boıynsha Tabıǵı monopolııalardy retteý komıtetiniń departamenti «MJ Logistic LTD» kompanııasynyń balamasyz kirme jol boıynsha retteletin qyzmet tarıfi men tarıftik smetasyn bekitý jóninde jarııa tyńdaý ótkizdi.
Kompanııa atynan sóz sóılegen menedjer Maqsut Maqanovtyń aıtýynsha JShS teńgeriminde uzyndyǵy 245 metr bolatyn kirme jol bar. Ol 2022 jylǵy 15 jeltoqsandaǵy satyp alý-satý sharty negizinde alynǵan. «MJ Logistic LTD» kompanııasy jyljymaly quramnyń relsten shyǵyp ketýin boldyrmaý, kúrdeli jáne aǵymdaǵy jóndeý jumystaryn ýaqtyly júrgizý, sondaı-aq sapaly retteletin qyzmet kórsetý maqsatynda osy kirme joldy satyp alǵan.
– Kirme joldy satyp alǵannan keıin, kompanııa tarıf jobasyn jáne tarıftik smetasyn Astana qalasynyń Departamentine bekitýge usyndy. Birinshi jyldyń qorytyndysy boıynsha biz shyǵyndyq ádispen jasalǵan tarıftik smetany – naqty jumsalǵan shyǵyndar negizinde usynyp otyrmyz. Tarıf jobasynda jalpy 230 myń teńge shyǵyn qarastyrylǵan bolatyn, alaıda ótken kezeńde naqty jumsalǵan soma 1 mln 180 myń teńgeni qurady. Jóndeý kezinde shpaldardyń kóp bóligi jaramsyz ekeni anyqtaldy. Osyǵan baılanysty materıaldar kólemi ulǵaıtyldy. 2025 jylǵa shpal aýystyrý nemese kúrdeli salymdar josparlanyp otyrǵan joq, – dedi M.Maqanov.
Budan ári spıker basqa shyǵyndar baptary týraly aıtyp ótti. Atap aıtqanda, «Jóndeý» babynda 680 myń teńge kóleminde shyǵyn qarastyrylǵan. Bul – Indýstrııa jáne ınfraqurylymdyq damý mınıstrliginiń buıryǵyna sáıkes negizgi quraldardyń qunyn arttyrmaıtyn kúrdeli jóndeý jumystaryna bólingen soma. Naqty jumsalǵan soma – 710 myń teńge.
– Jóndeý kezinde qurylys materıaldarynyń basym bóligi standarttarǵa sáıkes kelmeıtini anyqtaldy. Sondyqtan olardy tolyǵymen aýystyrýǵa týra keldi. Bul jumystar 2024 jyly atqaryldy, 2025 jylǵa mundaı shyǵyndar qarastyrylmaǵan, – dedi menedjer.
«Amortızatsııa» babynda 1 mln 470 myń teńge kóleminde shyǵyn eseptelgen. Bul soma amortızatsııalyq normalarǵa sáıkes esepteldi jáne naqty kórsetkishpen sáıkes keledi.
«Ákimshilik personaldyń eńbekaqysy» baby boıynsha 2 mln 568 myń 949 teńge qarastyrylǵan. Ortasha aılyq jalaqy – 110 myń teńge, áleýmettik aýdarymdar – 49 myń teńge. Mindetti áleýmettik medıtsınalyq saqtandyrýǵa (MÁMS) 67 myń teńge kóleminde shyǵyn kózdelgen. Bul soma 2025 jyly jalaqynyń 3%-yn quraıdy. Naqty eńbekaqy kólemi: dırektorǵa – 1 mln 20 myń teńge, býhgalterge – 1 mln 638 myń teńge.
«Salyqtar» baby boıynsha naqty shyǵyndar 120 myń teńgeni qurady, onyń ishinde:múlik salyǵy – 60 475 teńge, jer telimin paıdalaný úshin tólem – 60 446 teńge. Bul salyqtar 2025 jylǵa arnalǵan tarıftik smetaǵa engizilmegen.
Retteletin qyzmet kólemi, ıaǵnı 2024 jylǵy 1 tamyzdan 2025 jylǵy 31 shildege deıingi 12 aılyq kezeńde, 268,52 vagono-kılometrdi qurady, bul 548 vagonǵa sáıkes keledi. Kontragentterdi saýalnama negizinde zertteı otyryp, bul kórsetkishti 329,23 vagono-kılometrge deıin ulǵaıtý josparlanyp otyr.
Jalpy shyǵyndar somasy 4 mln 245 myń teńge kóleminde kózdelgen.
– Kompanııanyń negizgi maqsaty – kommertsııalyq paıda tabý emes, kontragenttermen jumys isteý jáne kirme joldyń tıisti jaǵdaıyn saqtaý. Sebebi bul joldy birneshe uıym paıdalanady, – dep túıindedi sózin Maqsut Maqanov.
Buǵan deıin, «Shyǵys — Batys» baǵyty boıynsha temir jolmen tranzıttik tasymal kólemin arttyrý qajet ekenin jazǵanbyz.