Astanada Kravtsov kóshesiniń bir bóligi ýaqytsha jabylady
ASTANA. KAZINFORM — Astanada Kravtsov kóshesinde 19-22 tamyz aralyǵynda kólik qozǵalysyna shekteý engiziledi, dep habarlaıdy qala ákimdiginiń baspasóz qyzmeti.
Bıylǵy jyldyń 19 men 22 tamyz aralyǵynda A. Kravtsov kóshesi boıynsha Sh. Ýálıhanov kóshesinen J. Tashenov kóshesine deıingi ýchaskede joǵarǵy qabatyn salý jumystary júrgiziledi.
— Osyǵan baılanysty atalǵan ýchaskede kólik qozǵalysy ishinara jabylatyn bolady. Bul rette qozǵalys eki baǵytta joldyń bir jaǵymen uıymdastyrylady. Júrgizýshiler men jaıaý júrginshilerden marshrýttardy aldyn ala josparlaýdy jáne qozǵalysty uıymdastyrýdaǵy yqtımal ózgeristerdi eskerýdi suraımyz, — delingen habarlamada.
Qaýipsizdikti qamtamasyz etý jáne qolaısyzdyqty azaıtý úshin ýaqytsha jol belgileri men kórsetkishter ornatylatyn bolady.
Budan buryn elordada Uly Dala dańǵylynan Syǵanaq kóshesine deıingi ýchaske ýaqytsha ishinara jabylatyny aıtyldy.
