Astanada kran qulap, qurylysshy qaza tapty
ASTANA. QazAqparat - Astananyń Esil aýdanynda «Aq Dıdar» turǵyn úı kesheniniń qurylys alańynda munaralyq kran qulady, dep habarlaıdy QazAqparat tilshisi.
Bul týraly agenttikke QR Investıtsııalar jáne damý mınıstrligi janyndaǵy Indýstrııalyq damý jáne ónerkásiptik qaýipsizdik komıtetiniń
Qazandyqtardy, gaz qondyrǵylaryn jáne kóterý qurylystaryn memlekettik qadaǵalaý basqarmasy habarlady.
Tótenshe oqıǵa 19 naýryz kúni tańerteń bolǵan. Aldyn ala málimetterge sáıkes, munaralyq krannyń sektsııasy qırap, turǵyzylyp jatqan úıge qulaǵan. Kabınada otyrǵan kranshy aýrýhanaǵa jetkizildi jáne sonda kóz jumdy.
«Indýstrııalyq damý jáne ónerkásiptik qaýipsizdik komıtetiniń Astana qalalyq departamentinde arnaıy komıssııa quryldy. Komıssııa oqıǵanyń mán-jaıyn anyqtaıdy. Komıssııa tujyrymdamasynan keıin ǵana sharalar qabyldanady, tekserýge 10 kún beriledi», - dep habarlady qalalyq basqarma.
