Astanada QR Zańgerleri odaǵynyń qalalyq bólimshesi ashyldy
ASTANA. 18 naýryz. QazAqparat -Elordada QR Zańgerleri odaǵynyń qalalyq bólimshesi ashyldy. Osyǵan oraı búgin Astana ákimdiginde atalǵan bólimsheni qurý boıynsha konferentsııa uıymdastyryldy.
«Menińshe, osy ispetti bedeldi ári bastamashyl uıymnyń astanalyq bólimshesin ashý arqyly biz zań salasyndaǵy kóptegen máselelerdi sheshe alamyz. Endi, bul jumysqa qaladaǵy zańgerlik qaýymdastyqtyń belsendi ókilderin keńinen tartý qajet», - deıdi qala ákiminiń orynbasary Ersaıyn Naǵaspaev.
Onyń aıtýynsha, búginde zańger-mamandardy bir uıymnyń aıasynda toptastyryp, jumys jasaý tájirıbesiniń mańyzy zor. Máselen, AQSh-ta Amerıka zańgerleriniń qaýymdastyǵy bar. Búginde atalǵan uıym quqyqtyq júıeni barynsha qamtyp, kásibı etıkadan bastap saıası mańyzy bar zańdardy ázirleý jumysyna belsendi túrde qatysyp keledi. Onyń ishinde Joǵarǵy sot pen federaldy sýdıalardy taǵaıyndaý, ádilet mınıstrliginiń joǵary laýazymdy tulǵalary men prokýrorlardy qyzmetke alý máseleleri bar. «Biz osyndaı álemdik tájirıbeden tys qalmaýymyz qajet. Qazaqstan Respýblıkasy zańgerleri odaǵy da bundaı jetistikke jetedi degen úmit bar», - dep atap kórsetti E.Naǵaspaev.
