Astanada QR Ulttyq ulanyna arnap salynatyn jańa áýe bazasynyń qurylysy bastaldy

ASTANA. QazAqparat - Elorda irgesindegi Astana halyqaralyq áýejaıynyń mańynda QR Ulttyq ulanyna arnap salynatyn jańa áýe bazasynyń qurylysyn bastaýǵa arnalǵan saltanatty shara ótip, nysan basynda aýqymdy jumystarǵa jolashar estelik kapsýla qoıyldy, dep habarlaıdy QR ІІM baspasóz qyzmeti.

Mańyzy bólek sharaǵa Іshki ister mınıstri, polıtsııa general-polkovnıgi Qalmuhanbet Qasymov, Ulttyq ulan Bas qolbasshysy general-leıtenant Rýslan Jaqsylyqov, atqarýshy bılik organdarynyń basshylary men ókilderi, ardagerler qaýymy men Ulttyq ulan Bas qolbasshylyǵynyń basshy quramy qatysty.

Búgingi tańda Ulttyq ulannyń áýe bazasy (3656 áskerı bólimi) Almaty oblysy Boraldaı kentinde jalǵa alynǵan jer teliminde ornalasqan. Boraldaı áýejaıynyń radıotehnıkalyq múmkindikteri kólik kemelerine aýa-raıynyń kúrt buzylǵan qıyn mezgilderinde, sondaı-aq túngi ýaqytta jáne ushaq sıpattamalaryna saı júk tasymalyn laıyqty júrgizip, ushyp-qonýǵa múmkindik berme almaı keledi.

Osy jaıttarǵa oraı Іshki ister mınıstrligi men Ulttyq ulan qolbasshylyǵy tarapynan áýe bazasyn Astana irgesine kóshirý týraly sheshim qabyldandy. Búgingi tańda jańa qurylys nysanyn salýǵa arnalǵan birinshi kezekti qurylys-jobalaý jumystary bastalyp ketti. Al qurylysty kelesi jyldyń sońyna deıin tolyqtaı aıaqtaý josparlanǵan.