Astanada QR Táýelsizdik kúnine oraı muqtaj zeınetkerlerge áleýmettik kómek kórsetiledi

ASTANA. 6 jeltoqsan. QazAqparat - Astanada QR Táýelsizdik kúnine oraı jasyna baılanysty memlekettik áleýmettik járdemaqy alatyndardyń qatarynan 300 muqtaj zeınetkerge 3 myń teńge kóleminde áleýmettik kómek kórsetiledi. Bul týraly astana.kz saıtyna qalalyq Jumyspen qamtý jáne áleýmettik baǵdarlamalar basqarmasynan habarlady.

«QR Táýelsizdik kúnine oraı muqtaj zeınetkerlerge, ıaǵnı eńbek ótili bolmaǵandyqtan eń tómen kólemde zeınetaqy alatyn azamattarǵa 3 myń teńgeden áleýmettik kómek kórsetiledi», - dep habarlady astana.kz saıtyna basqarmadan.

Buryn habarlanǵandaı, Qazaqstan Respýblıkasynyń Táýelsizdik kúnine oraı jergilikti bıýdjet qarjysy esebinen 1986 jylǵy 17-18 jeltoqsandaǵy oqıǵalarǵa qatysqandardyń ishinen oqıǵalar kezinde qasaqana kisi óltirgender men mılıtsııa qyzmetkeriniń, halyq jasaqshylarynyń ómirine qastandyq jasaǵandardan basqa (olarǵa qatysty qazirgi qylmystyq isterdi qaıta qaraý tártibi saqtalady), saıası qýǵyn-súrgin qurbandaryna 20 myń teńge kóleminde bir rettik aqshalaı tólem túrinde áleýmettik kómek kórsetiledi

Sonymen qatar, Táýelsizdik kúnine oraı elordalyq vedomstvolarǵa qarasty mekemelerde qarttarǵa, turaqty turatyn orny joq tulǵalarǵa, sondaı-aq múmkindigi shekteýli balalarǵa arnalǵan birqatar is-sharalar uıymdastyrylady.