Astanada QR Táýelsizdik kúnine oraı 20 myń teńgeden áleýmettik kómek kórsetiledi

ASTANA. 4 jeltoqsan. QazAqparat - Astanada Táýelsizdik kúnine oraı 1986 jylǵy 17-18 jeltoqsan oqıǵalaryna qatysqandarǵa áleýmettik kómek kórsetiledi. Bul týraly astana.kz saıtyna qalalyq Jumyspen qamtý jáne áleýmettik baǵdarlamalar basqarmasynan habarlady.

«Qazaqstan Respýblıkasynyń Táýelsizdik kúnine oraı jergilikti bıýdjet qarjysy esebinen 1986 jylǵy 17-18 jeltoqsandaǵy oqıǵalarǵa qatysqandardyń ishinen oqıǵalar kezinde qasaqana kisi óltirgender men mılıtsııa qyzmetkeriniń, halyq jasaqshylarynyń ómirine qastandyq jasaǵandardan basqa (olarǵa qatysty qazirgi qylmystyq isterdi qaıta qaraý tártibi saqtalady) saıası qýǵyn-súrgin qurbandaryna 20 myń teńge kóleminde bir rettik aqshalaı tólem túrinde áleýmettik kómek kórsetiledi», - delingen habarlamada.  

Sonymen qatar, Táýelsizdik kúnine oraı elordalyq vedomstvolarǵa qarasty mekemelerde qarttarǵa, turaqty turatyn orny joq tulǵalarǵa, sondaı-aq, múmkindigi shekteýli balalarǵa arnalǵan birqatar is-sharalar uıymdastyrylady.