Astanada QR Prezıdenttik mádenıet ortalyǵynyń 10 jyldyq mereıtoıyna arnalǵan «Rýhanııat ordasy» atty merekelik kesh ótedi

Keshte «Ulttyq dástúrler teatrynyń» ánshileri men bıshileri merekege arnap kontsert qoıady. Sondaı-aq onda mereıtoıǵa oraı on jyl boıy ózderiniń úlgili qyzmetterimen kózge túsken qyzmetkerler Mádenıet mınıstrliginiń marapattaý qaǵazymen marapattalady.

Sondaı-aq onda «Elbasy jáne Elorda» atty kórme uıymdastyrylady dep kútilýde. Kórme «Táýelsiz Qazaqstan», «Shejire», «Astana» dep atalatyn úsh bólimnen turady. Usynylǵan kórmede Eýrazııa qurlyǵynyń eń ádemi qalalarynyń birine aınalǵan Qazaqstannyń jas astanasynyń qalyptasý kezeńderi men Astanany qurýǵa qaıtalanbas qoltańba qaldyrǵan Elbasynyń eren eńbekteri kórinis tapqan. Kórmege kelýshiler onda Astana qalasynyń burynǵy tarıhy men búgingi jarqyn kelbetinen maǵlumat beretin tarıhı fotosýretterdi, 50 qujat pen 52 planshetti tamashalaıtyn bolady.

Sharaǵa Parlamenttiń, Úkimettiń, Prezıdenti Ákimshiligi men Mádenıet mınıstrligi, dıplomatııalyq korpýs, Astana qalasy ákimdigi men buqaralyq aqparat quraldarynyń ókilderi, sondaı-aq qala turǵyndary men qonaqtary shaqyrylyp otyr.

Esterińizge sala keteıik, Qazaqstan Respýblıkasynyń Prezıdenttik mádenıet ortalyǵy Elbasy N.Nazarbaevtyń qatysýymen 2000 jyldyń 24 qazanynda ashylǵan bolatyn. Elbasy bul ortalyqty mádenıet pen ónerdiń, ǵylym men bilimniń, eń bastysy rýhanııattyń shańyraǵy bolsyn degen nıetpen ashqan edi. Ortalyq búgingi tańda bes túrli baǵytta qyzmet atqarady: Qazaqstan Respýblıkasy Memlekettiliginiń tarıhy mýzeıi, Qazaqstan Respýblıkasy memlekettiligi jáne Prezıdenttik ınstıtýtyn zertteý ǵylymı zerthanasy, kitaphana, kontsert zaly - «Ulttyq dástúrler teatry», «Mádenı mura» jýrnaly.