Astanada QR Prezıdentiniń "Bolashaq" halyqaralyq stıpendııasy túlekteriniń besinshi forýmy ótýde
Bıyl forým Almaty jáne London qalalarynda bir ýaqytta uıymdastyryldy.
Atalmysh shara aıasynda 70-ten astam jumys berýshiniń qatysýymen bos jumys oryndarynyń jármeńkesi jáne bilimderin keńeıtetin semınarlar ótti.
QR Prezıdenti Ákimshiligi Basshysynyń orynbasary, "Bolashaq" assotsıatsııasy keńesiniń tóraǵasy Baýyrjan Baıbektiń atap ótkenindeı, sońǵy ótkizilgen eki jármeńke onyń tıimdiligin kórsetti.
"Sońǵy eki jylda bolashaqtyqtardyń sany kúrt artty. Olardyń barlyǵy da ózderine jumys taýyp, qyzmetterin sátti atqarýda. Men "Bolashaq" ókili retinde aıta alamyn, qazir burynǵy bolashaqtyqtar ózderiniń keıingi izbasarlaryna jetekshilik etip, sheteldik JOO-ny jańa bitirgen túlekterdiń jumysqa ornalasýyna kómek qolyn sozyp jatyr", - deıdi B.Baıbek.
Sonymen qatar forýmda jyraqta bilim alyp kelgen mamandarǵa ózin-ózi jumys berýshiniń aldynda qalaı tanystyrý kerektigin, keleshekte jetistikke qol jetkizýdiń joldaryn úıretetin trenıngter men dárister ótkizildi.
B. Baıbektiń aıtýynsha, keıingi barǵan jastardyń aqparattyq tehnologııalar, zymyran qurastyrý, nano- jáne bıotehnologııalar, áýe tehnıkasy salalarynda alǵan bilimderi eldiń ındýstrııalandyrý saıasaty aıasynda óte qajetti mamandyqtar bolyp tabylady. Sondyqtan olardy jumysqa ornalastyrý boıynsha esh qıyndyqtar týyndamaýy tıis.
