Astanada QR Premer-Mınıstri K. Másimovtiń qatysýymen belgili sýretshi Baqtybek Talqambaevtyń kórmesi ashyldy
ASTANA. 8 aqpan. QazAqparat /Jasulan Amanbaıuly/ - Búgin, 8 aqpan kúni Astanadaǵy «Kórme» zalynda QR Premer-Mınıstri Kárim Másimovtiń qatysýymen belgili sýretshi Baqtybek Talqambaevtyń «Altyn adam týraly ańyz» atty kórmesi ashyldy.
Kórmeni «Daýa» atty art-terapııa stýdııasy uıymdastyrǵan.
Qala turǵyndary kórmede Baqytbek Talqambaevtyń óz týyndylarymen qatar, shákirtteriniń jumystarymen de tanysyp, tamashalaı alady.
Kórmege 60 týyndy qoıylǵan. Onyń 34-i B.Talqambaetiki, qalǵan 26 sýret onyń izin qýǵan shákirtteriniń eńbekteri. Onyń shyǵarmalary tańbaly órnekten qurylǵan kompozıtsııalardan turady.
«Daýa» atty art-terapııa stýdııasynda ár jastaǵy adamdar sýretpen, keskindememen aınalysa kele óz boılaryndaǵy syrqattardan arylýǵa jol tabady eken. Osylaısha ol erkin shyǵarmashylyq júıesine súıene otyryp, júıkeni qalpyna keltirý ádistemesin jasady. Kórmeniń ózgesheligi de osy.
Onyń aıtýynsha, bul ádisti Japonııa, AQSh jáne birqatar Eýropa elderiniń ǵalymdary qabyldaǵan.
«Kórmedegi jumystar avangardtyq baǵyt, abstraktsııalyq aǵymda salynǵan. Meniń Almatyda, Astanada jáne Shymkentte birneshe myńdaǵan shákirtterim bar. Ártúrli jastaǵy adamdar. Іshindegi eń egdesi Sherhan Murtaza», -deıdi B. Talqambaev.
Qazaqstan Sýretshiler odaǵynyń múshesi Baqtybek Omaruly Talqambaev1949 jyly dúnıege keldi.
Ońtústik Qazaqstan oblysynda týǵan. Máskeý sáýlet ınstıtýtynyń sáýlet fakýltetin, KSRO Sýretshiler odaǵy janyndaǵy E.Rozemblıýmniń dızaın ortalyq oqý-ádistemelik stýdııasyn bitirgen. Qylqalam sheberi uzaq jyl boıy qoldanbaly ónerdiń san túrli salasynda jemisti eńbek etip keledi. Ol qazaqy úıge qajetti esikter, kebejeler, ydys-aıaqtardy aǵashtan oıdy. Sáýletshi retinde Shymkent qalasyndaǵy birqatar ǵımarattardyń jobasyn jasady. Onyń kóptegen óner týyndylary Japonııa, AQSh, Frantsııa, Bolgarııa, Norvegııa jáne TMD elderinde jeke kollektsıonerleriniń qorynda saqtaýly.
