Astanada QR Memlekettik kúzet qyzmeti Prezıdenttik orkestri halyqtyq mýzyka ansambliniń kontserti ótti
ASTANA. QazAqparat - Búgin «Shabyt» Qazaq ulttyq Óner ýnıverıtetinde QR Memlekettik kúzet qyzmeti Prezıdenttik orkestri jańa maýsymyn jarııalap, ony halyqtyq mýzyka ansambli ashty.
«Búgingi kontsertti QR Memlekettik kúzet qyzmeti Prezıdenttik orkestriniń halyqtyq mýzyka ansambli ashyp otyr. Ol vedomstvonyń tuńǵysh basshysy Amantaı Kúreńbekovtyń qoldaýymen ótýde. Jalpy aıtqanda, QR MKQ Prezıdenttik orkestriniń mıssııasy - Qazaqstandy halyqaralyq mýzyka arenasynda tanytyp, sheteldik tyńdarman men kórermendi mýzyka arqyly bizdiń baı mádenıetimizben, tarıhymyz jáne salt-dástúrimizben tanystyrý», - dedi ansambl jetekshisi leıtenant Ábilǵazy Ahmadıev.
Onyń aıtýynsha, halyqtyq mýzyka ansambli 14 adamnan quralǵan. Olardyń ishinde Jandos Muhtarov, Baqytjan Dúısenǵazıev, Erbol Muhamedıev syndy halyqaralyq jáne respýblıkalyq konkýrstardyń júldegerleri bar.
«Bul kontserttiń basqalardan aıyrmashylyǵy biz halqymyzdyń tól týyndylaryn oryndap qana qoımaı, basqa halyqtardyń ulttyq mýzykasy men estradalyq ánderdi de qazaqtyń ulttyq aspaptarymen oryndaýymyzda. Muny burynnan belgili mýzykalyq týyndylarǵa jańasha kózqaras dep ataýǵa da bolady», - dep tolyqtyrdy ol.
Sondaı-aq, ansambl jetekshisiniń aıtýynsha, bıyl ujymnyń el aýmaǵynda jáne shetelderge gastroldik saparlary josparlanǵan.
Aıta keteıik, 1997 jyly qurylǵan bul ansamblde dombyra tartýdyń túrli mektepteri (shertpe, tókpe), halyq ánderin oryndaýdyń ortalyq, ońtústik, batys mektepteri keńinen nasıhattalady.
