Astanada QR QOQM janyndaǵy Qoǵamdyq ekologııalyq keńes otyrysy ótti

Bul týraly mınıstrliktiń baspasóz qyzmetinen habarlady.

QR Qorshaǵan ortany qorǵaý mınıstri Nurlan Qapparovtyń tóraǵalyǵymen ótken Keńes otyrysy jumysyna ortalyq memlekettik organdardyń, baǵynysty jáne úkimettik emes uıymdar men qoǵamdyq birlestikterdiń ókilderi qatysty.

Qoǵamdyq ekologııalyq keńes músheleri BUU-nyń klımattyń ózgerýi týraly Negizdemelik konventsııanyń XVIII Konferentsııasynyń nátıjelerin talqylady.

Barshaǵa belgili bolǵandaı, Qazaqstan Kıoto hattamasynyń ekinshi kezeńinde osy qujattyń «B» qosymshasyna qatysýshy elder qataryna qosylady. Bul elimizge parnıktik gazdardyń shyǵaryndar kólemin negizge alynǵan 1990 jylǵy kórsetkishterden 5%-ǵa qysqartý mindetin júkteıdi. Kıoto hattamasynyń mindetterin oryndaýdyń 2013 jyldyń 1 qańtarynda bastalatyn ekinshi kezeńi 8 jylǵa sozylyp, 2020 jyldyń 31 jeltoqsanynda aıaqtalmaq.

Sonymen qatar, otyrysqa qatysýshylar ekologııalyq retteý jáne baqylaý júrgizýdiń jańa úlgisiniń tujyrymdalyq jobasyn talqylady.

Memlekettik ekologııalyq qyzmetin reformalaý óndiristik keshenniń tabıǵatqa keltiretin keri áserin turaqtandyrý jáne birtindep azaıtýdyń joldaryn izdestirýge baǵyttalyp otyr. Bul tujyrymdamanyń iske asyrylýy qorshaǵan ortany qorǵaý salasyndaǵy ókiletti organnyń elimizdiń óndiristik keshenimen ózara qarym qatynasynyń tıimdiligin arttyryp, onyń qyzmetiniń jalpy jaqsarýyna jetkizý tıis.

Keńes músheleri Qazaqstannyń Orhýs konventsııasynyń oryndalý barysymen, onyń ishinde - qoǵamnyń aqparatqa qoljetimdigin, onyń qorshaǵan orta máseleleri boıynsha sheshim qabyldaýǵa qatysýy jáne sot ádildigine qol jetkizýi boıynsha mindetterdiń júzege asyrylýyn talqylady.

Sondaı-aq, otyrysqa qatysýshylar salalyq memlekettik áleýmettik tapsyrysty qalyptastyrý boıynsha usynystar engizdi.