Astanada QR Eńbek kodeksine engizilgen ózgerister men túzetýler túsindirildi
Bul týraly elorda ákimdiginiń resmı saıtynda habarlady.
Astana qalasynyń atqarýshy organdarynyń ókilderine, jumys berýshilerge, kásipkerlerge, kásipodaq aktıvine kodeks normalary túsindirilip, mıgratsııanyń ózekti máseleleri talqylandy.
Aıta keteıik, bes ınstıtýtsıonaldy reforma aıasynda, «100 naqty qadam» ult josparyn júzege asyrý maqsatynda jańa Eńbek kodeksi qabyldandy. Qujat halyqaralyq tájirıbeni eskere kele, eńbek zańnamasyn yryqtandyrýǵa negizdelip otyr.
« Ult josparynyń 83-shi qadamyna sáıkes, jańa Eńbek kodeksi ázirlendi. Ol 2016 jyldyń 1 qańtarynan bastap kúshine enedi. Osyǵan baılanysty barlyq jerde Eńbek kodeksiniń jańa erejeleri men normalaryn túsindirý jumystary júrgizilýde. Búgin atqarýshy organdardyń ókilderi, jumys berýshiler Kodekstiń keıbir tustaryn túsindirýdi ótindi», - dedi Astana q. Kásipodaq ortalyǵynyń tóraǵasy Sársenbaı Myńbaev.
Jańa Eńbek kodeksi jumys berýshiler men jumysshylardyń arasyndaǵy eńbek qatynastaryn aıqyndaı tústi, olardyń roli men jaýapkershiligin bekitti. Sonymen qatar, mınımaldy eńbek standarttary, bazalyq kepildikter men jumysshylarǵa tólenetin ótemaqylar, sondaı-aq, jumys berýshiler tarapynan oryndaýdy baqylaý tártibi belgilendi.
Eń tómengi áleýmettik standarttar ár adamnyń eńbek bostandyǵyna, eńbek jaǵdaıyna jáne esh kemsitýshiliksiz eńbek úshin syıaqy alý konstıtýtsıonaldyq quqyǵyn tolyq dárejede qamtamasyz etedi.
Semınarǵa QR Densaýlyq saqtaý jáne áleýmettik damý mınıstrligi Eńbekti qorǵaý jónindegi respýblıkalyq ǵylymı-zertteý ınstıtýtynyń bas dırektory Serikqalı Bısaqaev, Astana qalasy ІІD Kóshi-qon polıtsııasy basqarmasy bastyǵynyń orynbasary Oral Ádilbaev pen Astana q. Jumyspen qamtý basqarmasy basshysynyń orynbasary Qaırat Iskakov qatysty.
