Astanada QR boks federatsııasynyń jyldyq konferentsııasy ótti
ASTANA.KAZINFORM — Qazaqstan boks federatsııasy búgin elordadaǵy «Qazaqstan» jeńil atletıkalyq sport kesheninde jyldyq konferentsııa ótkizdi.
Jıynǵa Qazaqstan boks federatsııasynyń prezıdenti Shahmurat Mútálip jáne tolyq basshylyq quram qatysty. Sonymen qatar, ulttyq qurama bapkerleri men aımaqtyq boks federatsııalarynyń basshylary bas qosty. Sport jáne dene shyqtyrý isteri komıtetiniń tóraǵasy Rýslan Esenalın men Ulttyq Olımpıadalyq komıtetiniń bas hatshysy Álimjan Aqaev qatysty.
— Biz jańa Olımpıadalyq kezeńge qadam bastyq. Qazirden bastap 2028 jyly Los-Andjeleste ótetin Olımpıada oıyndaryna daıyndyqty júıeli, ári belsendi túrde júrgizýimiz qajet. Ortaq strategııa aıasynda birlesip áreket ete otyryp, elimizdi laıyqty deńgeıde tanystyryp, Otandyq bokstyń halyqaralyq arenadaǵy bedelin odan ári arttyra alamyz dep senemin. Aldaǵy ýaqytta bizdi burynǵydan jaýapkershiligi esh kem emes jyl kútip turǵanyn atap ótkim keledi. Negizgi kúsh-jigerimizdi 2026 jyly Japonııada ótetin jazǵy Azııa oıyndary jáne 2028 jyly Los-Andjeleste ótetin jazǵy Olımpıada oıyndary daıyndyǵyna baǵyttaýymyz qajet. Aǵymdaǵy jyldyń sońyna deıin biz birqatar mańyzdy jarystardy ótkizýdi jáne olarǵa qatysýdy josparlap otyrmyz, — dedi Shahmurat Mútálip jıynnyń alǵysózinde.
QBF bas hatshysy Mereı Aqshalov óz baıandamasynda 2024 jylǵa federatsııa jumysy boıynsha esep berip, aldaǵy jobalar jaıynda aıtyp ótti.
Sonymen qatar, jıynda erler quramasynyń bas bapkeri Qaırat Sátjanov, áıelder quramasynyń aǵa bapkeri Marat Qyryqbaev, tóreshiler alqasynyń tóraǵasy Dinmuhamed Abaıhan 2024 jyl nátıjesi boıynsha esep berip, aldaǵy josparlardy jarııalady.
Osyǵan deıin habarlaǵanymyzdaı, bokstan Álem kýbogy 30 maýsym — 6 shilde aralyǵynda Astana qalasynda ótedi.