Astanada kózi nashar kóretinder úshin arnaıy avtobýs baǵdary bólindi
ASTANA. QazAqparat - 8 qyrkúıekten bastap qoldanystaǵy № 1 marshrýttyń bazasynan № 1A modıfıkatsııalyq marshrýty iske qosylady, dep habarlaıdy elorda ákimdiginiń resmı saıty «Astana LRT» AQ baspasóz qyzmetine silteme jasap.
Jańa baǵdar «Shubar» móltekaýdany, 78 kóshe, 7 mekenjaıyndaǵy «Qazaq zaǵıptar qaýymdastyǵy» QB men «Al-Ǵanı» meshitin kólikpen qamtamasyz etý maqsatynda quryldy.
№ 1A marshrýty qoldanystaǵy № 1 baǵdardyń bazasynda daıyndalǵan.
№ 1A baǵdarynyń júrý kestesi:
- «Kırpıchnyı t/a» aıaldamasynan bastap «Baraev kóshesi» aıaldamasyna deıin № 1 marshrýttyń kestesimen sáıkes qozǵalady, ary qaraı Qabanbaı batyr dańǵylynan tikeleı júrip ótip, solǵa - Kosmonavtar, ońǵa qaraı - Araı kóshesi - sońǵy aıaldama «Shubar» móltekaýdany.
Keri baǵytta Araı kóshesi, ary qaraı ońǵa Saraıshyq kóshesi - ońǵa Qabanbaı batyr dańǵyly - ary qaraı kestege sáıkes qozǵalady.
«Astana LRT» bul sharany turǵyndardyń ózderi jasaǵan ótinishinen keıin qabyldanǵanyn aıtty.
«Munyń aldynda kózi nashar kóretinder alysta ornalasqan aıaldamaǵa kelýge májbúr bolatyn, al qazir avtobýs «Shubar» móltekaýdanynda ornalasqan «Qazaq zaǵıptar qaýymdastyǵy» QB ornalasqan jerge deıin jaqyndatyldy.
Atalǵan avtobýs kúnine 10 ret qatynaıdy, aralyǵy 40 - 55 mınýttan.
Ýaqyty: tańǵy saǵat 06.30-dan keshki 20:57-ge deıin.
