Astanada Qostanaı jáne Qaraǵandy oblystarynyń jármeńkesi ótedi

Nur-Sultan qalasy ákimdiginen málim etkendeı, jármeńke «Han Shatyr» saýda, oıyn-saýyq ortalyǵy janyndaǵy alańda (Qonaev kóshesi men Turan dańǵylynyń qıylysy) ótedi.

Eki kún ishinde atalǵan eki oblystyń 14 aýdany men 7 qalasynan barlyǵy 130-dan astam kásiporyn aýylsharýashylyq ónimderin usynatyn bolady. Olardyń qatarynda sút, et ónimderin shyǵaratyn respýblıkaǵa jáne shet elge tanymal brend-kásiporyndar bar: «Shahterskoe» JShS, «Nátıje» JShS, «Redmılk» JShS, «EvrazııanFýds» JShS, «Qulager», «Dedov» JShS, «Metsger» JShS, «Mılh» JShS, «DEP» JShS, «Lıder-2010» JShS, «Baıan Sulý» AQ, «Terra» ShQ, «Qarjaý» ShQ, «TERRA MEAT» JShS, «Torǵaı Et» JShS, «Qorǵaý» JShS, «Sher-777» JShS jáne taǵy basqasy.
Elordaǵa salmaǵy 980 tonna bolatyn 100-den astam ónim túri jetkiziledi. Onyń ishinde mal eti – 150 tonnadan astam, sút ónimderi – 50 tonna, shujyq ónimderi jáne jartylaı et ónimderi – 20 tonna, balyq – 5 tonna, jarma jáne makaron ónimderi – 30 tonna, kartop pen kókónis – 60 tonna, un – 50 tonna.
Sondaı-aq, usynylǵan ónimderdiń assortımentine nan-toqash, kondıterlik ónimder, bal jáne ózgesi kiredi.
Barlyq ónim ortasha naryqtyq baǵadan 10-15% tómen satylatyn bolady.

«Kelýshiler sanıtarlyq-epıdemıologııalyq normalar men qashyqtyqty saqtaýdy, maska taǵýdy jáne sanıtaızerlerdi qoldanýdy umytpaýy kerek», - dedi astana ákimdiginen.