Astanada Qostanaı oblysy aýyl sharýashylyǵy ónimderiniń jármeńkesi ótip jatyr
ASTANA.QazAqparat - Aýyl sharýashylyǵy ónimderi jármeńkesine Qostanaı oblysynan 60-tan astam kásiporyn 380 tonna kóleminde taýar jetkizdi, dep habarlaıdy QazAqparat tilshisi.
Jármeńke respýblıka aımaqtarynyń qatysýymen aýyl sharýashylyǵy jármeńkesin ótkizý týraly is-sharalar jospary boıynsha sáıkes uıymdastyrylǵan. Ondaǵy maqsat - elimizdiń aımaqtarynyń agroónerkásip kesheniniń jetistikterimen tanystyrý, básekege qabiletti otandyq aýyl sharýashylyǵy ónimderin kórsetý.
Eki kún qatarynan ótetin jármeńkege oblystyń 14 aýdany men 3 qalasynan 60-tan astam kásiporyndar óz ónimderin saýdalaýǵa alyp keldi.
Jetkizilgen aýyl sharýashylyǵy ónimderiniń jalpy kólemi 380 tonnany quraıdy, onyń ishinde: 50 tonna mal eti (barlyq túri), 35 tonna sút ónimderi, 20 tonna shujyq jáne jartylaı daıyndalǵan ónimder, 30 tonna jarma jáne makaron ónimderi, 60 tonna kartop jáne kókónister, 20 tonna nan jáne kondıterlik ónimder, 20 tonna jumyrtqa, 50 tonna un jáne taǵy basqa ónimder bar.
«Jyl saıyn ótkizý dástúrge aınalǵan jármeńke bıyl Astananyń 20 jyldyǵyna arnalyp otyr. Qostanaıdan aýyl sharýashylyǵy ónimderiniń barlyq túrlerin ákeldik. Jáne barlyq ónimderdi Astana qalasyndaǵy qalyptasqan naryqtan 15% deıin tómendetilgen baǵamen satyp alýǵa bolady. Sonymen qatar shara aıasynda kontserttik baǵdarlama uıymdastyrylýda», -dedi Qostanaı oblysy aýyl sharýashylyǵy basqarmasynyń mal sharýashylyǵy bóliminiń jetekshisi Ádilbek Orazbaev.
Aýyl sharýashylyǵy ónimderi jármeńkesi 1-2 qyrkúıek kúnderi «Qazaqstan» sport kesheniniń (Q.Muńaıtpasov kósh., 9) janynda ótýde.
