Astanada Qosshy men oń jaǵalaýǵa arnalǵan eki deńgeıli LRT stantsııasy salynady
ASTANA. KAZINFORM — Astanada Qabanbaı batyr dańǵyly men Syǵanaq kóshesiniń qıylysynda LRT jelileri arasynda aýysyp minýge arnalǵan eki deńgeıli stantsııa salý josparlanyp otyr. Bul týraly City Transportation Systems basqarma tóraǵasy Asylbek Dúısebaev aıtty.
— Bul stantsııa aýysyp minýge arnalǵan. Mysaly, eski vokzaldan Qosshyǵa bara jatqan jolaýshy osy stantsııada basqa poıyzǵa aýysady, — dedi Asylbek Dúısebaev.
Onyń aıtýynsha, LRT jelileri arasyndaǵy aýysý stantsııanyń birinshi jáne ekinshi deńgeılerinde júzege asyrylady.
— Barlyq baǵytty bir jelige biriktirýge bolmaıdy, óıtkeni olar bir-birine kedergi keltiredi. Qazir bizde áýejaıdan jańa vokzalǵa deıin bir ǵana baǵyt bar. Al jeliler qıylysqan kezde, sheteldegideı birneshe tarmaq paıda bolyp, olardyń óz nómirleri bolady, — dedi ol.
Eske salsaq, LRT-nyń ekinshi kezeńin Qosshy baǵytyna salý josparlanyp otyr. Qarjylandyrý ýaqytyly bólinse, bul jelini 2027 jyly iske qosý kózdelgen.
Sonymen qatar Astanada LRT-nyń jańa baǵytyn qalanyń oń jaǵalaýyna deıin, Astana-1 temirjol vokzalyna deıin júrgizý josparlanyp otyr. Onyń uzyndyǵy birinshi kezeńnen de uzyn bolady, 26 shaqyrym. Bul baǵytta 22 quram qatynaıdy.
Jańa jelide barlyǵy 20 stantsııa bolady. Іske qosý merzimi qarjylandyrýǵa baılanysty bolmaq. Degenmen merdigerler qurylysty úsh jyl ishinde aıaqtaýdy josparlap otyr.
Buǵan deıin LRT-nyń birinshi kezeńi jolaýshylar úshin 16–17 mamyrda ashylatyny habarlanǵan edi. Kólik kún saıyn saǵat 06:00–den 23:00–ge deıin jumys isteıdi.
Operatordyń baǵalaýynsha, LRT iske qosylǵan alǵashqy kezeńde táýligine 25 myńnan 45 myńǵa deıin jolaýshy tasymaldanýy múmkin.
