Astanada qosymsha gaz jylý stantsııalary salynady
Astana qalasynyń ákimi Jeńis Qasymbek Instagram jelisindegi paraqshasynda qalany jylýmen jáne sýmen qamtamasyz etý úshin qandaı sharalar qolǵa alynyp jatqanyn aıtty, dep habarlaıdy Kazinform.
«Qalany jylýmen jáne sýmen qamtamasyz etetin ınfraqurylym nysandarynyń jumys barysymen tanystym. Olar – JEO-3, JEO-2, aýyz sý stantsııasy (SSS-3), «Turan» jáne «Ońtústik-Shyǵys» gaz jylý stantsııalary. Ózderińiz biletindeı, ótken jyldyń kúzinde biz «Ońtústik-Shyǵys» gaz jylý stantsııasynyń, «Turan» gaz jylý stantsııasynyń birinshi kezeńiniń, qurylysy uzaqqa sozylǵan JEO-3 nysanyn aıaqtadyq. Bul nysandar qalaǵa 1100 saǵ/Gkal-dan astam jylý beredi. Osylaısha bizge jylytý maýsymynda profıtsıtke shyǵýǵa múmkindik beredi», - dep jazdy ákim.
Onyń aıtýynsha, ótken jyldyń jazynda Astana sý qoımasynan tartylatyn sý qubyry jáne úshinshi aýyz sý stantsııasy salyndy. Joǵaryda atalǵan nysandardyń bári shtattyq rejımde jumys isteıdi.
«Qalany aldaǵy ýaqytta da jylýmen jáne sýmen qamtamasyz etý úshin qýatyn arttyrý jáne jańa nysandar salý boıynsha júıeli jumys júrgizemiz. Máselen, bıyl taǵy bir «Telman» gaz jylý stantsııasyn (1-kezek), «Turan» GJS ekinshi kezegin salamyz. Olar qalaǵa taǵy 850 Gkal/saǵ jylý qýatyn beredi. Qalany perspektıvaly túrde aýyz sýmen qamtamasyz etý úshin qazir sý qubyrynyń ekinshi jelisin salý jumysy júrip jatyr. Nura jerasty sý kózinen sý qubyryn jobalaý jáne Telman sorǵy stantsııasyn keńeıtýdi jobalaý jumysy aıaqtalyp qaldy», - dedi elorda ákimi.
