Astanada kóshpendiler shahary boı kóterdi

ASTANA. QazAqparat - Qala kúni merekesine oraı «Han Shatyr» saýda, oıyn-saýyq ortalyǵy aýmaǵynda etnomádenı keshen paıda boldy, dep habarlaıdy QazAqparat Astananyń medıa-ortalyǵyna silteme jasap.

Buqaralyq sharalardyń rejısseri Gúljan Ábdibaevanyń aıtýynsha, etnokeshen EKSPO kórmesi aıaqtalǵansha, ıaǵnı 10 qyrkúıekke deıin jumys isteıdi.

«Bul jerde qala turǵyndary men qonaqtary elimizdiń baı tarıhymen jáne erekshelikterimen tanysa alady», - deıdi G. Ábdibaeva.

Qalashyqta kóshpendilerdiń mádenıeti men turmysyna, salt-dástúrine arnalǵan dúnıeler bar. Keshenniń ishinde qolónershiler jármeńkesi, qazaqtyń kıiz úıi, shatyrlar men ulttyq ashana meıramhanasy bar.

«Saryarqa» aýdanynyń ájeılerinen quralǵan «Shańyraq» ansambli qazaq halqynyń «Tusaý kesý», «Qyz uzatý» syndy salt-dástúrlerin kórsetti.

«Biz kóshpendilerdiń baı tarıhyn kórsetkimiz keldi. Kóshpendilerdiń tarıhynan syr shertetin baıyrǵy joralǵylar men óleńder, qyzyqty dástúrler bizdiń kezimizge deıin saqtalǵan», - dedi G. Ábdibaeva.