Astanada kóshpendiler órkenıeti festıvali ashyldy (FOTO)
ASTANA. QazAqparat - Búgin shymyldyǵyn ashqan «Myńjyldyqtar toǵysyndaǵy Astana» festıvali elorda turǵyndary men qonaqtaryn kóshpendiler órkenıetimen tanystyrady. Atalǵan shara Astanada 9 jyl qatarynan ótkizilip keledi, oǵan 300-ge jýyq ártis qatysady. Munda ótken zamanda kıgen kıimderdi, dekoratsııalardy, qolóner sheberlerin jáne shabandozdardy kórýge bolady.
Festıvaldi uıymdastyrýshylardyń aıtýynsha, bıyl kelýshiler nazaryna jańa ınstallıatsııalar jáne eń bastysy - mýzeı usynylmaq.
«Bıylǵy festıvaldiń ereksheligi - bes kıiz úıden jasalǵan kóshpeliler mýzeıi. Taǵy da bir aıta keterlik jaıt, túrli ınstallıatsııalar ornatylady: túrki halqynyń basyn qosatyn balbaldar, kóshpendilerdiń turǵynjaılary, atrıbýttar. Kóbi kóshpendiler qalaı turǵan dep suraıdy. Úıleri qandaı bolǵan, kıimi. Osynyń barlyǵy festıvalde kórsetilgen», - deıdi «Myńjyldyqtar toǵysyndaǵy Astana» festıvaliniń ekinshi rejısseri Araılym Qaldybaeva.
Sonymen qatar, mýzeıde kóshpeli qazaq halqynyń materıaldyq jáne rýhanı mádenıetiniń artefaktileri, eskertkishteri qoıylǵan. Dástúrli turǵynjaı ıntereri jasalyp, ulttyq kostıýmniń túr-túri, áshekeıler, turmystyq zattar, qarý-jaraqtar usynylady. Elimizdiń murajaılarynyń qorlarynan jınalǵan eksponattar kelýshilerdi Ortalyq Azııadaǵy kóshpeliler órkenıetiniń álemimen tanystyrady.
«Munda jyl saıyn kelip turamyz, Qazaq handyǵy zamanyndaǵy batyrlardyń rólderin somdaımyz. Mysaly, men ata-babalarymyz kıgen kıimge uqsaıtyn batyrdyń kostıýmin kıip turmyn. Onyń salmaǵy 27 kg», - deıdi Almaty q. «Arlan» teatrynyń akteri Almas Kalıýllın.
Kóshpeliler órkenıetiniń ortalyǵy «Han Shatyr» saýda oıyn-saýyq ortalyǵyna qarsy alańda ornalasqan jáne 6 shildege deıin ashyq bolady. Shara barysynda kelýshiler nazaryna dástúrli mýzyka kontserti men aqyndar aıtysy, «At jalynda» atty sporttyq shoý, «Altyn saqa» jarysy, «Folklordaǵy ómir» etnoshoýy, kóshpendiler tsırki usynylady, sondaı-aq, kerýen saraı men halyqtyq qoldanbaly óner jármeńkesin, mýzykalyq aspaptar kórmesin jáne t.b. aralaýǵa bolady.
Foto: Vıktor Fedıýnın
© 2016 MIA «Kazınform»
