Astanada «Kóshpendiler álemi» halyqaralyq festıvali ótedi
Festıvaldiń tujyrymdamasy Túrki halyqtarynyń Úlken Quryltaıy modeline negizdelgen. Sátti dep tanylǵan shara Vengrııada 2008 jyldan bastap ótkizilip keledi.
«Kóshpendiler álemi» halyqaralyq festıvali jeti aýyldan turady:
«Aq mergen» aýyly kóshpendilerden kele jatqan kóne qarý sadaqpen atýdyń sheberlerin anyqtaıdy;
«Shabyt» aýyly túrki halyqtarynyń etnıkalyq mýzykasymen tanystyrady;
«Taıbýryl» aýyly «Kókpar tartý», «Aýdaryspaq», «Qyz qýý», «Asaý» jáne taǵy basqa ulttyq oıyndardy pash etpek;
«Kerýen saraıy» aýyly meımandarǵa kóshpendilerdiń as ázirleý ádisi men mázirin usynbaq;
«Aq saqa» aýyly «Qazaq kúresi», «Arqan tartý», «Asyq atý» jáne taǵy basqa kóshpendilerdiń dástúrli oıyndaryn kórsetip, rýhy men bolmys-bitimi berik batyrlar óz ónerin ortaǵa salady;
«Batyr» aýyly dala batyrlarynyń ejelgi shaıqastarynyń qyr-syrymen tanystyrady;
«Sheber» aýyly qolóner sheberleriniń buıymdaryn pash etýmen qatar, ony jasaýdyń syrymen bólisedi.
Qazaqstan astanasynyń 20 jyldyǵyna oraılastyrylǵan festıval aıasynda orta ǵasyrlardaǵy jaýjúrek batyrlardyń beınesi qaıta «tiriledi», maıdan dalasyndaǵy aıqas kórsetilip, kóshpendiler mádenıeti pash etiledi.
Odan bólek, Amazonkalardyń óneri kórermender esinde qalar qyzyqty qoıylym bolmaq deıdi uıymdastyrýshylar.
Halyqaralyq sharaǵa Qazaqstannan ózge Vengrııa, Bolgarııa, Túrkııa, Ýkraına, Bashqurtstan, ıAkýtııa, Qyrǵyzstan komandalary qatysady.
«Biz bul festıval arqyly kóshpendilerdiń dástúrin jańǵyrtyp qana qoımaı, halyqaralyq statýs alatyn brendke aınaldyrǵymyz keledi. Festıvaldiń ereksheligi - birneshe janrda bolýy. Ózimizdiń ónerpazdardan bólek 100-den asa sheteldik kóshpendiler mádenıetin jańǵyrtýshylar qatysady. Aıtýly sharada jalpy sany 5 myńnan asa qonaq bolady dep kútýdemiz», - dedi «Kazakh Tourism» UK AQ Basqarma Tóraǵasynyń orynbasary Tımýr Dúısenǵalıev.
Festıvaldi QR Mádenıet jáne sport mınıstrliginiń týrızm ındýstrııasy Komıtetiniń tapsyrysymen jáne Astana qalasy Ákimdiginiń qoldaýymen «Kazakh Tourism» UK AQ uıymdastyrýda.
Etnofestıval 30 maýsym men 1 shilde aralyǵynda «Qazanat» ıppodromynyń aýmaǵyndaǵy «Etnoaýyl» Ulttyq-mádenı kesheni janyndaǵy alańda uıymdastyrylady. Qala boıynsha arnaıy kólik qarastyrylǵan.
